By: Jim Lloyd Dongiapon
Gikataho sa Philippine Coast Guard (PCG) karong Miyerkules, Agosto 10, nga nasakpan sa ilang K9 Field Operating Unit Southwestern Mindanao, kauban ang Philippine National Police (PNP), ang kapin kon kulang 500 gramos sa methamphetamine hydrochloride, kon “shabu,” sa cargo area sa usa ka mairline company sa Zamboanga International Airport sa Zamboanga City niadtong Lunes, Agosto 8.
Ang Coast Guard Working Dog (CGWD) nga si Bunny ang nakakaplag sa kontrabando, nga dunay gibanabanaang market value nga ₱3.4 million.
Matud sa inisyal nga imbestigasyon, gipadala sa usa ka Farhana Maddih gikan Maluso, Basilan, ang maong kadudahang bagahe, ug pagadawaton unta sa usa ka Dayana Ismael nga taga-PHILCOA, Commonwealth Avenue, Quezon City.
Lakip usab niini ang mga butang nga gigamit aron itago ang kontrabando, sama sa mga pakete sa binulad nga isda ug usa ka plastik nga sudlanan nga dunay unod nga “bubuk,” usa ka lokal nga delikasiya nga gama sa gisangag nga karne sa lubi.
Sumala sa PCG, ila nang gitunol ang gikumpiskang bagahe ngadto sa Philippine Drug Enforcement Agency (PDEA) Region IX alang sa dugang imbestigasyon ug tukmang disposisyon.
Samtang, gidayeg ni Zamboanga City Mayor John Dalipe ang PCG, PNP, ug PDEA human malampusong nasakpan ang nasangpit nga kontrabando.