By Jim Lloyd Dongiapon
Usa ka tawo ang patay ug tulo ka uban pa ang nagpabiling ginapangita human sa pagdahili sa yuta sa Barangay Don Salvador Lopez sa Mati City niadtong Miyerkules, Disyembre 28.
Sumala sa datos gikan sa Philippine Atmospheric, Geophysical and Astronomical Services Administration (PAGASA), ang low pressure area (LPA), nga ulahing nasiplatan 200 kilometros (km) amihanang sidlakan sa Hinatuan, Surigao del Sur o 210 km sidlakan sa Surigao City, Surigao del Norte, ug sa shear line, diin nagatagbo ang init ug bugnaw nga hangin, ang nahimong hinungdan sa pagdahili sa yuta.
Subay sa taho nga gipagula sa Mati City Information Office, nahitabo ang pagdahili sa yuta pasado alas 11:00 sa buntag sa Purok Sangay sa nasangpit nga barangay.
Ang pagdahili mipahilit sa pito ka purok: Upper Cangusan, Lower Cangusan, Proper Cangusan, Tabon-tabon, New Camotes, Sta. Cruz ug Biasong.
Nakuha usab ang usa ka patay’ng lawas sa wala pa mailhing hamtong nga lalake alas 5:38 kagahapon sa hapon sa mga rescue team gikan sa City Disaster Risk Reduction and Management Office (CDRRMO), Philippine National Police (PNP), Davao Oriental Provincial DRRMO, Bureau of Fire Protection (BFP), Bangsamoro Radio Assistance on Communication and Emergency Services (BRACES), Philippine Army, ug sa City Social Welfare and Development Office (CSWDO).
Tungod gikaingon nga mas delikado ang maong dapit inig gabii, temporaryo usang gihunong ang retrieval operations alas 6:04 kagabii. Gikatakda kining magpadayon alas 7:00 karong buntaga.
Samtang, wala pa natino ang ilhanan sa tulo ka nahibiling nangawala sa pagsulat niining balita.