By: Jim Lloyd Dongiapon
Kasamtangang gina-monitor karon sa Dakbayan sa Koronadal sa South Cotabato ang duha sa mga barangay niini nga nadesignar isip “high-risk” areas sa African Swine Fever (ASF) virus.
Giila sa Koronadal City Veterinary Office kini nga mga barangay, nga mao ang Barangay Magsaysay ug Barangay Topland, nga duna usab pinakadagkong mga populasyon sa mga baboy sa dakbayan.
Segun ni City veterinarian Dr. Charliemagne Calo, tungod kining duha ka mga barangay dunay daghang populasyon sa mga baboy kon itandi sa uban pang mga barangay, mas delikado usab nga mataptan og ASF kining mga dapita.
Miangkon usab si Calo nga nanginahanglan og mas hugot nga monitoring ang mga nasangpit nga barangay gumikan sa ilang huyang nga biosecurity, partikular na ang kawad-on sa mga koral sa mga kulungan sa baboy, nga mao’y motugot sa daling pagsulod sa mga tawo ug uban pang mga mananap nga posibleng nagadala og mga mikrobyo nga mamahimong hinungdan sa pagkaylap sa ASF.
Dugang pa sa city veterinarian, tungod natala ang usa ka incursion—usa ka impeksyon nga naggikan sa gawas sa dakbayan—niadtong Hulyo, gidesi gnar ang Koronadal City isip ASF “Pink Zone,” o usa ka komunidad nga duol sa lugar nga dunay kumpirmadong kaso.
Miresulta kini sa pagpamatay sa 850 ka mga baboy gikan sa commercial farms ug 33 gikan sa backyard farms isip pagpaningkamot nga kontrolahon ang maong kagaw. Gidili usab ang pagbiyahe sa mga baboy sulod sa ASF zone gikan 500 metros hangtod usa ka kilometro.
Gilayong mihatag og hinabang pinansyal ang lokal nga panggamhanan ngadto sa mga naapektuhang magbubuhi og baboy, nga mokabat ngadto sa PHP 131,000.
Sa laing bahin, gibutyag ni South Cotabato Provincial Veterinarian Dr. Flora Bigot nga, gawas sa Koronadal City, upat pa ka ubang lungsod sa lalawigan ang kasamtangang nakasinati og mga outbreak sa ASF. Kini nga mga lungsod mao ang Banga, Surallah, Norala, ug Tantangan.