Share:

By Jim Lloyd Dongiapon

Taliwala sa nagapadayong krisis sa sibuyas bombay sa nasud, kapin kon kulang 44,000 ka kilo sa iligal nga sibuyas bombay ang nadiskubrehan sa mga tigpatuman sa balaod niadtong Enero 23 sa usa ka pantalan sa Varadero de Cawit, Barangay Cawit, Zamboanga City, sumala sa press release gikan sa Naval Forces Western Mindanao sa Philippine Navy.

Gilusad ang maong operasyon sa Naval Forces Western Mindanao, kauban ang Philippine Coast Guard, Marine Battalion Landing Team-11, Joint Task Force Zamboanga, Bureau of Customs Zamboanga District, ug intelligence personnel gikan sa Armed Forces of the Philippines Western Mindanao Command.

Ang mga gipayuhot nga mga sibuyas nadiskubrehan sa samang adlaw nga gi-anunsyo sa Department of Agriculture nga mosuloday na ang gipaabot nga unang batch sa mga gipang-angkat sa nasud. 

Kinatibuk-ang 11,000 ka mesh bags sa sibuyas bombay, nga nagtimbang og kwatro kilogramos matag usa, ang nasakmit gikan sa usa ka closed-van cargo truck ug usa ka wooden vessel nga dunay ngalang MJ MARISA. 

Samtang, sa samang adlaw, nakumpiska usab nila ang kapin 300 ka drum sa gipayuhot nga petrolyo, lana, ug mga produktong lubrikante sa usa ka water vessel nga dunay ngalang ML ZHARY.

Apan, wala pa mailhi sa Naval Forces Western Mindanao ang mga consignee sa mga kontrabando, lugar nga gigikanan niini, ug mga tag-iya sa nasakmit nga mga sakyanan.

Ang tanan nga nakumpiska nga mga butang giimbentaryo agig pagpangandam alang sa pagtunol niini sa hingtungdang ahensya.

Dungan niini, ang Naval Forces Western Mindanao misaad nga padayon silang motabang sa mga local government unit ug mga ahensya sa gobyerno sa ilang kampanya batok sa smuggling sa Zamboanga Peninsula.

Leave a Reply