By Frances Pio
Ilang lugar sa Metro Manila ang pansamantalang makakaranas ng water service interruptions mula Biyernes hanggang Sabado dahil sa nasirang pipeline na kailangang ayusin, ayon sa Maynilad Water Services Inc.
Sinabi ng Maynilad, sa isang advisory, na ang mga Lungsod ng Maynila, Makati, Parañaque, Pasay at Las Piñas ay maaapektuhan ng pagkaantala ng serbisyo.
Ang Triple 8 Construction & Supply Inc., isang third-party contractor para sa draining project, ay aksidenteng naputol ang pipeline ng Maynilad sa kahabaan ng Pureza Street corner Abad Santos sa Maynila, na humantong sa pagtagas sa lugar.
“Dahil dito, kinakailangan magsagawa ang Maynilad ng urgent repair works sa lugar. Para magawa ito, kinakailangan i-dewater ang tubo at i-expose ang nasirang bahagi nito para sa maayos na assessment at repairs,” ayon sa water concessionair.
Nabanggit din nito: “Tinatayang aabutin ng 18 hanggang 36 na oras ang aktibidad, depende sa laki ng pinsala at mga kinakailangang pagkukumpuni.”
Bagama’t nangangako itong ipagpatuloy ang pagpapakalat ng mga mobile water tanker para maghatid ng malinis na tubig, pinayuhan pa rin ng Maynilad ang mga apektadong customer nito na magtipid ng sapat na tubig sa panahon ng pagkaputol ng serbisyo.