By Jim Lloyd Dongiapon
Patay ang lima ka tawo, lakip ang usa ka masuso, ug nangaangol ang kapin 20 ka uban pa human nga mibangga ang usa ka pickup truck sa lain pang six-wheeled elf truck pasado alas 4:00 sa Lunes sa buntag, Disyembre 5, sa Barangay Agusan, Cagayan de Oro City.
Sumala sa inisyal report gikan sa Cagayan de Oro City Police Office (COCPO), nagamaneho sa elf truck si Julieto Jabagat, residente sa Baloi, Barangay Tablon, CDO, sa may National Highway sa dihang gibangga kini sa pickup truck.
Lulan sa maong pickup truck ang 21 ka miyembro sa pamilya Pagtalunan, nga pauli unta sa Barangay Santa Ana, Tagoloan, Misamis Oriental, human mitambong sa lubong sa ilang paryente sa Zamboanga del Sur.
Dugang pa niini, miangkon si Jabagat nga gisulayan niya og tamak ang preno elf truck, apan wala na niya napahunong ang iyang sakyanan sanglit ang pickup truck mismo ang mibangga kaniya, nga mao’y hinungdan sa maduguong aksidente.
Namatay ang tigmaneho sa pickup truck ug upat ka pasahero niini mismo sa gipanghitaboan sa aksidente.
Kapin 20 ka tawo ang samaran sa panagbangga, ug sila gidala sa pinakaduol nga balay tambalan aron mahatagan og tukmang medikal nga pag-atiman.
Samtang, gikataho ni COCPO Police Station 6 traffic investigator Police Corporal (PCpl.) Rodulfo Abaday nga anaa na sa ilang kustodiya si Jabagat.
Ang nasangpit nga tigmaneho sa elf truck mag-atubang og mga kasong reckless imprudence resulting in multiple homicides, multiple physical injuries, ug damage to property.
Sa laing bahin, gipahiluna na ang mga patayng lawas sa mga biktima sa Bollozos Funeral Homes sa samang dakbayan.