Gibutyag ni Vaccine Czar ug National Task Force Against Covid-19 Chief Implementer Secretary Carlito Galvez Jr. nga aduna nay 50% ka mga trabahante sa turismo sa highly urbanized cities sa Cebu mga bakunado na batok sa Covid-19.
Ang highly urbanized cities mao ang Cebu, Mandaue ug Lapu-Lapu.
Atol sa ceremonial vaccination sa mga trabahante sa turismo sa Cebu karong adlawa, Setyembre 24, 2021, nagkanayon si Galvez nga ang industriya sa turismo usa kini nga naghatag og kita sa ekonomiya sa nasud.
“The Province of Cebu is considered as one of the country’s top tourist destinations because of its world-class marine attractions, historic sites, and its mouth-watering cuisines,” matud pa ni Galvez.
Sila si Tourism Secretary Bernadette Romulo-Puyat, Deputy Chief Implementer Secretary Vince Dizon, Project Balik Buhay chairman Edmun Liu, PBB co-chair Kenneth Cobonpue ug Hotel, Resort and Restaurant Association in Cebu Inc. president Alfred Reyes nitambong usab sa maong kalihukan nga gipahigayon sa Oakridge sa Mandaue City, Cebu.
Sa laing bahin, si Dr. Mary Jean Loreche, ang tigpamaba sa Visayas COVID-19 Vaccination Operations Center nagkanayon ang mga volunteer sa Cebu Vaccination Group moadto sa Bantayan Island karong Oktubre 1 hangtud 3, 2021 aron ipahahigayon ang pagpamakuna sa maong isla.
Ang Bantayan Island gilangkuban kini sa tulo ka munisipyo-Bantayan, Santa Fe ug Madredijos. Daghan usab mga tourist spot ang makita sa maong dapit. (By: April Therese Tan)