By Jim Lloyd Dongiapon
––
Mimata ang Barangay Maganda sa lanog sa buto sa armas dihang ang amahan sa suspek sa pagpamatay sa Ateneo de Manila nga si Dr. Chao Tiao Yumol gipusil-patay gawas sa iyang panimalay pasado 6:55 sa buntag Biyernes, Hulyo 29.
Giila ni Police Lieutenant Colonel (PLT. Col.) Tadzhael Managola, officer-in-charge sa Lamitan PNP, ang biktima nga si Rolando “Bobong” Yumol, edad 69, ug usa ka retiradong pulis.
Si Bobong ang amahan ni Bobong Dr. Yumol, ang akusado sa pagpatay kang kanhi Lamitan Mayor Rose Furigay, iyang dugay nang executive assistant nga si Victor Capistrano, ug security guard nga si Jeneven Bandiola sa Ateneo de Manila University sa Quezon City niadtong Dominggo, Hulyo 24.
Sumala sa ilang inisyal nga taho, gipatay si Bobong samtang nakasakay sa iyang motorsiklo gawas sa iyang panimalay sa usa sa mga suspek nga nakasakay isip tandem sa usa ka motorsiklo.
Ang biktima, nga nakahiagom og upat ka samad-pinusilan, ang gidala pa sa Lamitan District Hospital, diin gideklara kining dead on arrival sa attending physician nga si Dr. Alfonso L. Bravo.
Nakuha usab ang usa ka .45 kalibreng pistola sa gipanghitabuan sa krimen.
Wala’y nakit-ang mga saksi ang pulisya nga makahatag sa ila og dugang impormasyon kalabot sa krimen.
Padayon pang gina-imbestigahan sa Lamitan PNP ang kaso aron matino ang motibo ug ang mga sad-an niini. Sa karon, wala pa naka-establisar og lead ang kapulisan sa pagpatay kang Bobong Yumol.
Giawhag ni PLT. Col. Managola ang publiko nga magbinantayon sa ilang mga post ug mga komento sa social media ug likayan ang pagpangagpas kalabot sa krimen.
Sa pikas bahin, namahayag si Atty. Quirino Esguerra, ang legal counsel alang sa Furigay family, nga gikakurat ug gikasubo nila ang maong insidente. Nanawagan usab sila ngadto sa pulisya nga imbestigahan pag-ayo ang maong kaso.
Samtang, mihangyo usab si, Atty. Esguerra ngadto sa publiko nga likayan ang pagpangagpas kalabot sa motibo sa pagpatay kang Yumol.