By Jim Lloyd Dongiapon
––
Gi-anunsyo sa Davao City Library and Information Center (DCLIC) nga pormal na silang muabli ugma, Biyernes, Hulyo 15, 2022, alas 7 sa buntag.
Sa ilang Facebook page, miingon ang DCLIC nga kinahanglang mukuha og Library Card ang mga bisita, nga mukantidad og ₱30 or ₱100 matag usa, depende kung regular-type ba kini o PVC (polyvinyl chloride) card. Balido ang card sulod sa usa (1) ka tuig.
Sa pagkuha sa card, hatagan og orientation ang mga bisita labot sa mga nakalakip sa matag klase sa card.
Sa regular card, tugutan ang bisita nga maniksik gamit lamang ang mga libro, ug wala kini access sa mga computer unit sa pasilidad. Sa pikas bahin, ang PVC-type card mutugot sa nanag-iya niini nga makagamit og internet sulod sa usa ka oras, ug tugutan sab sila nga makahulam og libro ug dad-on kini gawas sa bibliyoteka.
Dugang pa niini, kinahanglan usab i-andam sa mga bisita ang ilang SafeDavaoQR (DQR) codes sanglit kinahanglan kini aron makasulod sa librarya.
Abli ang DCLIC Lunes hangtod Biyernes, gikan alas 7 sa buntag hangtod alas 7 sa gabii. Apan, magpahigayon sila og survey kung palapdan ba nila ang ilang oras sa operasyon ngadto sa 24/7.
Ang bag-ong bibliyoteka sa dakbayan ang usa ka upat ka andanas nga gambalay nga nahimutang sa C. Bangoy Street, o mas nailhan sa mga daan niining ngalan nga Ponciano Reyes Street. Gisugdan niadtong 2018 ang pagtukod niini.
Duna kini mga reading areas alang sa mga bata ug mga hamtong, amphitheater, information technology center, conference rooms, usa ka coffee shop nga nahimutang sa unang andana, ug usa ka open-air nga organic garden sa rooftop niini.