By Jim Lloyd Dongiapon
Sa pagpaningkamot nga mapadayon ang kaayohan nga nahimo sa proseso sa kalinaw tali sa Philippine Government ug sa Moro Islamic Liberation Front (MILF), gipasiugdahan sa gobyerno sa Bangsamoro ang pagpahiluna sal “rido,” o clan war, tali sa magkaaway nga mga pamilya sa tri-boundary sa Cotabato City, Sultan Mastura, ug Sultan Kudarat sa Maguindanao del Norte.
Sa tabang ni Bangsamoro Autonomous Region in Muslim Mindanao (BARMM) Chief Minister Ahod “Kagi Murad” Ibrahim, pormal nang gitapos sa mga pamilyang Ayunan-Pasawiran ug Subpangan, ingon man MILF 105th Base Command, ang ilang “rido” kagahapon, Nobyembre 24, sa usa ka seremonyang gipahigayon sa Bajau Hall, Bangsamoro Government Center, Cotabato City.
Isip kabahin sa ilang pasalig nga tapuson na ilang bangi, mipirma sila og peace covenant ug misaad nga tabangan ang mga awtoridad sa pagkab-ot sa malungtarong kalinaw.
Misaksi sa “rido” settlement sila BARMM Senior Minister Abdulraof Macacua, Minister of the Interior and Local Government (MILG) Atty. Naguib Sinarimbo, Minister of Public Order and Safety (MPOS) Hussein Muñoz, ang Philippine Army, ang Philippine National Police, ang Ad Hoc Joint Action Group (AHJAG), ang Coordinating Committee on the Cessation of Hostilities (CCHH), sila Sultan Mastura Mayor Doc. Bong Panda ug Cotabato City Mayor Bruce Matabalao.
Nagpasalamat si Macacua sa mga lokal nga panggamhanan tungod sa ilang pagpaningkamot sa pagkumbinser sa tulo ka mga pamilya nga tapuson na ilang panagbangi ug pilion na ang kalinaw.
Gikaingon nga nagsugod ang gubat sa mga pamilya niadtong tuig 2018, diini mokabat sa kapin 20 ka tawo na ang nangamatay gikan sa tanang bahin sa panagbangi.