By: Jim Lloyd Dongiapon
Temporaryong gibawal sa Cagayan de Oro City ang pagsulod sa mga buhing baboy, karne sa baboy, ug ubang mga produkto nini gikan sa kasikbit nga Zamboanga Peninsula Region sukad niadtong Sabado, Nobyembre 19.
Sumala sa City Veterinary Office (CVO), subay ang desisyon sa ulahing National African Swine Fever (ASF) Zoning Status, diin ang ZamboPen gihimutang isip “Red zone,” o usa ka dapit nga dunay kumpirmadong kaso sa ASF nga nagkinahanglan og pagpugong sa posibleng pagkaylap sa kagaw.
Dugang sa CVO, ang pagbawal usa ka krusyal nga lakang sa pagpanalipod sa naga-recover pa lang nga industriya sa baboy sa dakbayan, human sa pagpaubos sa estado sa CdeO gikan “Red zone” ngadto sa “Pink zone.”
Ang Pink Zones mao ang mga dapit nga wala’y natalang kaso sa ASF, apan dunay mga kasikbit nga Red Zones. Kini nga designasyon nakatutok sa pagpugong sa pagkaylap sa mga kaso gikan sa ASF-infected nga mga lugar pinaagi sa mga lakang nga magpakunhod niini sama na lang sa biosecurity ug pagpaniid.
Sa laing bahin, kasamtangang nagapahigayon ang National ASF Prevention and Control Program (NASFPCP) ug mga aktibidad nga may kalabutan sa pag-monitor ug pagpaniid sa pipila ka mga darohan sa baboy ug mga stockyard sa upat (4) ka mga lungsod sa probinsya sa Zamboanga Sibugay. Ang mga magbubuhi og baboy gire-orient sab sa tukmang biosecurity measures aron mapugngan ang impeksyon sa ASF ngadto sa mga buhing baboy. Matapos kining mga kalihokan karong Disyembre 2, 2022.