By: April Therese Tan
Atol sa gipahigayon nga selebrasyon sa Cebu Press Freedom Week, si Cebu Governor Gwen Garcia nisaad nga buhaton ang tanan alang sa pagtabang sa Cebu media nga makabaton og kaugalingong panimalay.
“I will try my very best as governor that our Cebu media be given the opportunity to own their own houses. Ngano gud intawn nga dili makaangkon og balay ang atong Cebu media?,” matud pa sa gobernadora.
Mao kini ang tubag ni Garcia human sa mensahe ni Arnold Bustamante, ang napili pag-usab nga presidente sa Cebu Federation of Beat Journalists atol sa gipahigayon nga oathtaking kagabie, Septembre 21, 2022 nga gi administer ni Garcia.
Nagkanayon si Bustamante sa iyang mensahe ngadto sa gobernadora nga subo palandungon nga daghang mga sakop sa Cebu media nga dili makabaton og housing loan sa Pag-ibig Fund gumikan sa ka gagmay sa mga sweldo.
Nipadayag si Garcia sa iyang “solemn commitment” nga iyaha kining ipadangat ang maong sentimento sa Department of Human Settlement and Urban Development.
Ang CFBJ ang nag-inusarang letihimong media organization sa Cebu nga gilangkuban kini sa 12 ka nagkadaiyang beat assignments.
“I opted that we would host you tonight here at the Capitol because this should mark a relationship that we have nurtured through the years. Love me or hate me, it seems that all these years, you have been there, reporting on a Gwen Garcia,” dugang pa sa gobernadora.