By Jim Lloyd Dongiapon
––
Nagpagawas og chemical spill alert ang Davao City Central 911 human sa pagka-aksidente sa usa ka sakayanan pasado 11:44 sa gabii niadtong Lunes, Agosto 1, nga gikalambigitan sa usa ka tanker truck nga nagadala og caustic soda, kon sodium hydroxide, usa ka makasunog ug makahilo nga kemikal, duol sa Suawan River sa Lower Lanitum, Barangay Suawan, Marilog District, Davao City.
Subay sa pasiunang imbestigasyon sa Marilog Police Station, milikay sa pag-igo sa usa ka lain pang sakyanan ang driver sa truck samtang nagabiyahe kini sa Davao-Bukidnon National Highway paingon sa Davao City. Tungod niini, ang tanker mitipadlong, mibangga sa poste, ug nahulog mga 50 ka piye ngadto sa dal-og.
Kini misangpot sa usa ka caustic soda spill sa duol nga Suawan River.
Malampusong naluwas sa Central 911 ang truck driver ug ang iyang pahinante. Apan, gideklarang patay ang driver samtang ang iyang pahinante gitambalan on-site ug nagdumili na sa pagpadala sa ospital.
Gipahibalo na sa Central 911 ang insidente ngadto sa Department of Environment and Natural Resources’ Environmental Management Bureau (DENR-EMB).
Gumikan nga ang pagkaladlad ngadto sa taas nga konsentrasyon sa caustic soda makadaot sa mata, panit, digestive system, ug baga, nga mamahimo pang resulta sa permanenteng pagkadaot o di kaha sa kamatayon, gi-abisuhan na sa City Disaster Risk Reduction and Management Office (CDRRMO) ang mga residente sa Davao nga dili maligo o mangisda duol sa Suawan River o sa mga sanga sa Davao River.
Dugang pa, ang dugay o balik-balik nga pagkontak sa panit mamahimong hinungdan sa dermatities, ug ang balik-balik nga paglanghab sa sodium hydroxide vapor mamahimong hinungdan usab sa permanenteng kadaot sa baga.
Sumala sa mga taho gikan sa gipanghitabuan sa insidente, duna nay nangamatay nga mga isda daplin sa Suawan River. Aron masuta ang lebel sa kontaminasyon, susihon sa DENR-EMB ug ang Davao City Health Office (CHO) ang water samples gikan sa Suawan River.