By: April Therese Tan
Pinaagi sa hiniusang controlled delivery operation, ang Philippine Drug Enforcement Agency-7 inubanan sa Bureau of Customs of Ninoy Aquino International Airport ug Cebu, Customs Intelligence and Investigation Service, ug Enforcement and Security Service, nakasikop pag Lunes sa Cebu City ang claimant sa package nga adunay sulod nga Ecstacy na nagkantidad og P5 milyones.
Ang maong package, nga gi gi consign ngadto sa usa ka residente sa Barangay Pasil, Cebu City, gideklarar nga imported nga sinina sa babaye gikan sa Netherlands ug gipaagi sa Port of NAIA.
Apan sa kaabtik ug todo nga profiling sa Port of NAIA frontliners, ang maong package nadiskubrehan nga adunay ilegal nga drugas.
Ang PDEA-7 ug BOC-Cebu nag koordinar alang sa pagpahigayon og controlled delivery operation ug sa pagdakop sa claimant.
Matud pa sa BOC-Port of Cebu sa ilang Facebook post, ang claimant, giila nga si Lunel Garcia Paden, 30 anyos, nanawag sa Philippine Postal Cebu Central Office pag Hulyo 18, 2022 alang sa in door-to-door delivery sa maong package.
Sa pagdawat niini, ang PDEA agents inubananan sa mga opisyales sa CIIS ug sa ESS Port of Cebu gidakop dayon ang maong claimant ug gikuha ang maong package nga adunay sulod nga 2,984 nga colored ecstacy nga tabletas.
Ang maong drugas anaa na sa kustodiya sa PDEA-7 alang sa case build up ug pag prosecute batok ni Paden gumikan sa pagsupak sa Republic Act No. 9165 o ang Comprehensive Dangerous Drugs Act of 2002.