Share:

By: Jim Lloyd Dongiapon

Hindi pa tapos ang laban (Wala pa natapos ang atong pakigbugno),” mao kini ang gipadayag ni kanhi Cotabato City Administrator Atty. Jarissa Guiani-Mutlah sa iyang Facebook post human makabalita nga gibasura niadtong Lunes, Agosto 15, sa Commission on Elections (COMELEC) Second Division ang electoral protest nga giduso ni kanhi Cotabato City Mayor Cynthia Guiani-Sayadi batok sa kasamtangang alkalde sa dakbayan, si Mohammad Ali “Bruce” Matabalao.

Kalabot niini, gimantala sa opisyal nga Facebook page sa Cotabato CIty Government ang kopya sa kamanduan nga gipirmahan nila Commissioners Marlon Casquejo ug Rey Bulay. Ang maong kamaduan mibasurea sa mga protesta nga giduso nila Guiani-Sayadi, former Vice Mayor Graham Nazer Dumama, Japal Guiani III, ug sa ilang mga kandidato alang sa konseho sa siyudad.

Gipahayag usab sa samang kamanduan nga gipasaka unta ni Guiani-Sayadi ang iyang protesta ngadto sa COMELEC En Banc inay sa Second Division sanglit wala sila’y hurisdiksyon niini. 

Dugang niini, gibasura usab ang mga protesta ni Japal Guiani III ug sa mga kandidato pagka-konsehal sanglit dili sila ang aktwal nga mga partido nga nalambigit sa kaso ug wala usab sila nakabayad og filing fees. 

Kahinumduman nga human siya napildi sa milabay nga May 9, 2022 elections, nagduso si Guiani-Sayadi og electoral protest aron ma-nullify ang mga resulta gikan sa 36 clustered precincts sa Barangays Poblacion II, Poblacion VII, Bagua II, Kalangalan Mother, ug Kalangalan I. 

Giangkon sab sa bahin ni Matabalao nga duna na lamang usa ka kaso batok kanila, nga mao ang judicial revision ug recount sa mga resulta gikan sa 17 clustered precincts sa Barangays Rosary Heights I, XIII, ug IX.

Apan, sa laing bahin, giklaro ni Guiani-Mutlah nga nagapadayon pa ang tanang electoral protests nga giduso sa ilang kampo. Miingon usab siya nga duna’y nahitabong resealing sa election paraphernalia sa COMELEC office sa Cotabato City niadtong Martes sa hapon, Agosto 16.

Huwag po tayong agad na maniwala sa mga pinapakalat na balita. Let us continue to pray that truth will prevail as it always will and that justice will be served for the people of Cotabato City (Dili unta ta motuo dayon sa mga ginapakatag nga balita. Padayon kita sa pag-ampo nga mupatigbabaw ang kamatuoran sama sa kanunay ug aron nga mahatagan og hustisya ang katawhan sa Cotabato City),” saysay ni Guiani-Mutlah sa iyang post, kini kalabot sa impormasyon nga gipagula sa kampo ni Matabalao.

Leave a Reply