By Jim Lloyd Dongiapon
––
Mo-operate kaduha kada semana ang mga bag-uhay lang nga gilusad nga direct flight sa Philippine Airlines (PAL) gikan Cotabato City padulong Tawi-Tawi ug vice versa, matag Lunes ug Huwebes.
Ang Flight PR2487 gikan Cotabato City padulong Tawi-Tawi molarga alas 7:30 sa buntag ug motugpa alas 8:40 sa buntag.
Samtang ang Flight PR 2488 gikan Tawi-Tawi padulong Cotabato City molarga alas 9:30 sa buntag ug motugpa alas 10:50 sa buntag.
Mamahimong makapili ang mga pasahero gikan sa economy o premium economy seating alang sa ilang biyahe.
Mi-abiso usab ang PAL ngadto sa publiko nga posibleng mabag-o ang mga schedule sa biyahe gumikan sa nagabag-o-bag-ong travel ug quarantine restrictions.
Sa pikas bahin, gihulagway sa gobyerno sa Bangasamoro Autonomous Region ang paglusad sa direktang ruta isip “first of its kind” sa rehiyon, ug gilauman kining mukonekta sa mainland Bangsamoro ngadto sa mga islang probinsya niini, ug mupausbaw sa ilang ekonomiya.
Atol sa inaugural flight niadtong Huwebes, Hunyo 9, namulong si Bangsamoro Chief Minister Ahod Ebrahim ayha ang paglupad.
Gikaingon niini nga ang maong biyahe ang “nagatapos sa dugay nang hagit sa pagkadugtong sa Tawi-Tawi ngadto sa BARMM mainland ug sa uban pang dapit sa nasud.”
“Ang kining inaugural flight usa ka simpleng lakang aron mamahimong mas maayong lugar ang Mindanao alang sa mga Muslim, Kristiyano, ug mga Lumad,” dugang niya.
Malaumon usab si Mindanao Development Authority (MinDA) Secretary Maria Belen Acosta nga mapalapdan pa ang mga biyahe sa umaabot nga panahon gikan sa kaduha kada semana ngadto sa adlaw-adlaw nga operasyon.
“Hinaut unta nga ang biyahe maka-pick up ug mamahimong adlaw-adlaw sanglit bag-o pa lang ang direktang flight, sobra-sobra na ang demand alang sa ekonomikong aktibidad,” ingon ni Acosta.
Ilusad unta niadtong Disyembre 20, 2021 ang mga flight, apan na-irog kini tungod sa Super Typhoon Odette, COVID-19 Omicron variant surge, Typhoon Agaton, ug sa election period.