By: Jim Lloyd Dongiapon
Human ang duha ka tuig sukad mitala og unang mga kumpirmadong kaso sa African Swine Fever (ASF) virus ang siyudad, nakatakda nang ipaubos ang Davao City gikan sa “Red Zone” classification ngadto sa “Yellow Zone.”
Subay sa ASF color-coding scheme sa Department of Agriculture (DA), ang “Red Zone” usa ka lugar nga dunay kumpirmadong kaso sa ASF; ang lugar nga tapad sa Red Zone gikonsidera nga “Pink Zone”; ang “Yellow Zone” nanginahanglan gihapon og hugot nga monitoring tungod sa taas nga populasyon sa mga baboy ug ang taas nga risgo sa ASF; ang usa ka dapit duol sa Yellow Zone mao ang “Light Green Zone”; ug, ang“Dark Green Zone” nagtimaan nga ang lugar wala na’y mga kaso sa ASF.
Matud ni Dr. Gay Pallar, ang ASF Focal Person sa Davao City Veterinary Office, wala na nakatala sa kasamtangan ang ilang buhatan og mga kaso sa ASF o kamatayon sa mga binuhing baboy tungod sa outbreak.
Gikumpirma usab sa meat inspection division sa CVO nga wala na sila nakatala og mga ASF-infected nga karne sukad Hunyo ning tuiga, kanus-a nagpositibo sa maong kagaw ang usa ka gikatay nga baboy gikan sa Maa Slaughterhouse.
Apan, gipahayag usab ni Pallar nga padayon gihapon ang ilang buhatan sa pag-monitor sa mga binuhing baboy matag semana.
Niadtong tuig 2020, natala sa Dakbayan sa Davao ang unang mga kaso sa ASF niini sa mga Barangay sa Inayangan, Lamanan, ug Dominga sa Calinan District; Barangay Magsaysay sa Marilog District; ug Barangay Colosas sa Paquibato District.
Ang padayon nga mga outbreak sa ASF sa Pilipinas nagsugod niadtong Hulyo 2019, kanus-a ang mga unang kaso niini natala gikan sa mga baboy gikan sa mga lalawigan sa Rizal ug Bulacan.
Sukad Hulyo 2022 2022, nakaapekto na ang ASF sa 53 ka mga probinsya, 704 ka mga dakbayan ug mga lungsod, ug 3,832 ka mga barangay.