By Jim Lloyd Dongiapon
Pormal nang gisagop sa Davao City ang Executive Order (EO) No. 7 series of 2022 ni Presidente Ferdinand “Bongbong” Marcos, Jr., nga nagamando na sa boluntaryong pagsuot og face mask mapasulod man o mapagawas.
Gipagula sa Davao City ang kopya sa Executive Order No. 71 Series of 2022 Biyernes, Disyembre 2, nga nag-anunsyo sa pagpalu-ag sa polisiya sa face mask ug sa pagsubli sa kamahinungdanaon sa padayong pagpatuman sa minimum public health standards.
Subay sa EO, opsyonal na lang ang pagsuot og face mask, gawas na lang sa mga mosunod nga lugar:
- – Healthcare facilities (sama sa clinics, hospitals, laboratories, nursing homes, ug dialysis clinics);
- – Medical transport vehicles (ambulansya, ug aramedic rescue vehicles); ug,
- – Pangpublikong transportasyon, mapa-yuta, kahanginan, o sa kadagatan man.
Kusganong gitambagan nga magsul-ob og face mask ang mga tigulang, mga tawo nga adunay balatian, mga tawo nga immunocompromised, mga mabdos, kadtong wala pa nabakunahan, ug mga tawo nga adunay sintomas
Gi-anunsyo ni Davao City Mayor Sebastian “Baste” Duterte niadtong Huwebes, Disyembre 1, atol sa pag-abli sa Pasko Fiesta sa Davao 2022, nga gipirmahan na niya ang kamandoan nga motugot na sa opsyonal nga pagsuot og face mask.
Ang maong pamahayag malipayong gidawat usab sa mga Dabawenyo.
Dugang pa niini, iyang gidayeg ang iyang mga ginsakpan tungod sa kinasingkasing nga pagtuman nila sa COVID-19 protocols, nga mao’y nahimong hinungdan sa pagsulod na sa endemic phase sa pandemya.
Bisan pa man opsyonal na lang karon ang pagsuot og face mask, giaghat gihapon sa mayor ang tanan nga mosuot niini, ilabi na karong ginalauman ang daghang mga tawo sa usa ka bulan nga Pasko Fiesta events.
Mahuloganon usab ang desisyon sa dakbayan nga sagopon na ang polisiya sa opsyonal nga pagsuot og face mask tungod kining tuiga usab ang nagtimaan sa unang face-to-face nga kasaulogan sa kapaskuhan sukad nga gipatuman ang COVID-19 restrictions niadtong 2020.
Kahinumduman nga ang Pasko Fiesta niadtong 2020 gikanselar, samtang ang edisyon niini niadtong 2021 pinaagi sa virtual lamang gipahigayon.