Share:

By: Jim Lloyd Dongiapon

Sa pagsugod sa face-to-face classes sa ubang tunghaan sa mga milabay nga adlaw, nabantayan nga nanglisod ang mga Dabawenyo sa pagbiyahe, ilabi na sa peak hours matag buntag ug gabii tungod sa kadaghan sa mga pasahero ug sa kakuwang sa mga nagabiyaheng public utility jeepneys (PUJs) sa kadalanan.

Aron matubang ang inadlaw-adlaw nga kalisdanan sa nagabiyaheng publiko, gikumpirma sa Davao City Transport and Traffic Management Office (CTTMO) Martes sa hapon, Agosto 16, nga ilang ibalik ang Peak Hours Augmented Bus System (PHABS), nga unang gipatuman niadtong tuig 2019. 

Unang gipahimutang ang PHABS aron mahatagan og pangpublikong transportasyon ang mga lugar nga wala kaayo maserbisyuhan sa dakbayan, ilabi na sa amihanan ug habagatang bahin sa dakbayan. Nahimo kining operational gikan alas 6:30 hangtod alas 9:00 sa buntag ug alas 5:00 sa hapon hangtod alas 9:00 sa gabii, nga katugbang sa natinong peak hours.

Mas mahal og gamay ang minimum nga plete sa  PHABS kung itandi sa mga PUJ apan duna kini mas maayo nga pasilidad sama sa fully air-conditioned units, CCTV cameras, mga komportableng lingkuranan, ug mas taas nga kapasidad sa mga pasahero.

Gawas pa sa PHABS, gipatuman usab kaniadto ang Interim Bus System (IBS) niadtong 2021 tungod sa limitadong kapasidad sa mga pasahero sa mga PUJs niadtong panahona. Nagsilbi usab kini sa mga samang ruta ug dunay samang pletehan sa PHABS.

Pag-abot sa tuig 2023, nga mao’y pinakasayo, ang PHABS ug ang IBS ma-convert na ngadto sa High Priority Bus System (HPBS), nga mamahimong nag-unang public transport system sa Dakbayan sa Davao 

Misaad si Mayor Sebastian “Baste” Duterte atol sa iyang inauguration speech niadtong Hunyo 27, 2022, nga papaspasan niya ang pagpatuman sa HPBS aron matubag ang mga suliran sa inadlaw-adlaw nga biyahe ug sa kahuot sa trapiko sa dakbayan. 

Kung hingpit na nga mahimuslan, ang HPBS dunay 29 ka mga ruta nga gitunga ngadto sa upat ka lebel, nga mao ang:

MetroDavao (dunay lima ka mga ruta nga mao’y moporma sa mga kinauyukang serbisyo nga magdugtong sa tanang dagkong sentro sa komersyo); 

DavaoInter (modagan subay sa walo ka mga ruta nga mokonekta sa mga sulod nga dapit sa kasyudaran direkta ngadto sa Davao Central Business District); 

DavaoFeeder (modagan subay sa siyam ka mga ruta nga modugtong sa mga gagmayng sentro ug mga dapit sa mas nagkatibulaag nga populasyon ngadto sa mga serbisyo sa MetroDavao); ug,

DavaoLocal (mao’y mosumpay ngadto sa gawas nga mga bukirong dapit sa dakbayan ug sa nag-unang sistema sa transportasyon o sa mga integrated terminal). 

Leave a Reply