By: Jim Lloyd Dongiapon
Kasamtangang ginaimbestigahan sa Davao City Police Office (DCPO) ang “persons of interest” nga posibleng responsable sa pagpatay sa negosyante ug modelo nga si Yvonnette Plaza Chua niadtong Disyembre 28, 2022.
Namahayag si DCPO Director Police Colonel (PCol.) Alberto Lupaz nga dili pa mabutyag sa kapulisan ang pagkatawo sa mga nahisgutan tungod kay nagpadayon pa ang imbestigasyon.
Dugang niya, nagatigum na sila og mga impormasyon ug mga saksi nga makatabang kanila sa pagtumbok sa mga naghimo sa krimen ingon man ang motibo niini.
Gikumpirma sab sa ilang buhatang ang CCTV footage, diin ang screenshot niini ang nagakatap na sa social media sukad pa niadtong milabayng semana. Apan, wala pa gihimong publiko ang kopya sa video isip kabahin sa imbestigasyon.
Makita sa maong hulagway ang mamumusil ug ang tigmaneho sa motorsiklo nga parehong nakasul-ob og full-face helmets atol sa ilang panaglalis tali kang Chua. Nakuhaan usab sa samang screenshot ang higayon diin mopabuto na ang mamumusil sa iyang armas ngadto sa biktima.
Segun ni Lupaz, ginatutukan karon sa imbestigasyon ngadto sa motibo sa krimen ang pagpagawat ug ang personal nga pagdumot ngadto sa negosyo ni Chua.
Gawas pa niana, ginasusi na sab sa kapulisan ang mga pamasangil nga nagakatag sa social media.
Lakip niini ang gikatahong relasyon ni Chua sa usa ka opisyal sa Army sa Davao Region ug ang nahitabo nga road rage, nga miresulta gikan sa panaglalis tali sa biktima ug sa mamumusil ug sa iyang kauban human nga mibangga ang ilang motorsiklo ngadto sa Montero Sport sa biktima.
Niadtong milabay nga semana, usa ka special investigation task group (SITG) ang gimugna na aron susihon ang maong kaso. Ang pagmugna niini gumikan sa pagsensasyon na sa publiko sa nasangpit nga kaso, matud ni Police Regional Office XI Spokesperson Police Major (PMaj.) Eudisan Gultiano.
Misaysay usab si Gultiano nga duna lamang duha ka semana ang SITG aron matino ug pasakaan og kaso ang mga sad-an.
Kalabot niana, mihangyo na ang mga awtoridad ngadto sa kinsa man ang dunay impormasyon kalabot sa krimen nga daling mokontak kanila.
Gipusil-patay si Chua sa tungod mismo sa iyang ginarentahang balay sa Buttercup Street, sulod sa Green Meadows Subdivision sa Tugbok District, Davao City, niadtong Miyerkules, Disyembre 28, 2022, pasado alas 7:25 sa gabii.