By Jim Lloyd Dongiapon
––
Gipatay sa mga manunulong ang hepe sa kapulisan sa munisipalidad sa Ampatuan, Maguindanao ug ang iyang escort, ug nasamdan ang tulo pa nila ka kaubanan sa usa ka pagpangbanhig Martes sa buntag, Agosto 30, sumala sa mga opisyal sa Philippine National Police (PNP) ug Armed Forces of the Philippines (AFP).
Giila ang mga biktima nga sila Police (PLt.) Lieutenant Reynaldo Samson, Ampatuan Municipal Police Station chief, ug Police Corporal (PCpl.). Salipudin Endab.
Segun ni Maguindanao Police Provincial Office (PPO) Director Police Colonel (PCol.) Christopher Panapan, usa ka armadong grupo gikan sa Bangsamoro Islamic Freedom Fighters (BIFF) nga gipangulohan ni Commander Boy Jacket ubos sa Karialan faction ug ni Commander Abdulnasser Sabtula Guianid, ang mibanhig sa mga personahe sa Ampatuan MPS, nga gipanguiohanm ni PLt. Samson samtang nagasubay kini sa Sitio Pasio, Barangay Kapimpilan, sa Ampatuan.
Miresulta kini sa kamatayon nila Samson ug Endab. Tulo ka uban pa gikan sa ilang grupo ang samdan.
Miatras ang grupo nga gipangulohan nila Boy Jacket ug Guianid dihang miabot sa lugar ang dugang pwersa sa PNP ug AFP.
Dugang ni Panapan, magsilbi unta og warrant of arrest ang grupo ni Samson sa maong dapit batok kang Kamir Kambal alang sa pagpanulis ug pagpanghulga og mga tawo isip kabahin sa ilang one-time-big-time nga pagpatuman niini.
Ayha pa man ang pagpangbanhig, giasoy na sa Ampatuan MPS ngadto sa Maguindanao PPO nga nakadawat sila og impormasyon nga dunay plano ang grupo ni Guianid nga patton si Samson bisan unsang oras man tungod sa hugot niini nga pagpatuman sa balaod trapiko sa munisipyo.
Naglusad na og hiniusang operasyon ang PNP ug AFP batok sa mga suspek.
Samtang, padayong mag-monitor ang intelligence units sa Maguindanao PPO sa mga kalamboan sa maong incidente ug maghatag sila og bag-ong impormasyon sa higayong makuha na nila kini.