Buot magpapili og usab si Cebu Vice Governor Hilario Davide III diin si former Department of Tourism Secretary Ace Durano mao ang iyang runningmate.
Matud pa ni Davide sa iyang press statement nga gipagawas kagahapong adlawa, Setyembre 30, 2021 nga naka disidir siya nga magpapili og usab isip bise gobernador kay si Ace usa ka sulungdon nga runningmate kay parehas man sila og “brand of leadership” ug mga prioridad nga programa.
Matud pa ni Davide nga dugay na silang nagkaila ni Ace, nga iyang gihulagway nga usa ka tawo nga tarong, sinsiro, mapaubsanon, may katakos, kalma ug angayan sad gyud nga mahimong lider sa mga mga Sugbuanon.
Nagkanayon si Davide ang makita kung unsa ka maayo si Ace basi sa iyang track record isip kanhi DOT secretary ug kanhi kongresista sa Cebu Fifth Congressional District.
Si Davide nahimong gobernador sa Cebu sulod sa duha ka termino gikan sa tuig 2013 hangtud 2019, diin numero uno niyang prioridad ang panglawas ubos sa iyang development agenda.
Sulod sa duha ka termino isip gobernor, si Davide nigahin og dakong budget sa panglawas ug mga programa labi na sa pagpalambo sa mga provincial and district hospital ug ingon man ang pagkuha og mga dugang healthcare workers.
(By: April Therese Tan)