By: Jim Lloyd Dongiapon
Usa ka non-working holiday sa pili nga mga probinsya ug siyudad ugma, Hulyo 30, isip pag-obserbar sa Islamic New Year o “Amun Jadid.”
Niadtong Hulyo 21, gi-anunsyo ni Bangsamoro Mufti Abuhuraira A. Udasan nga matunong ang unang adlaw sa Islamic New Year karong Sabado, Hulyo 30, nga katumbas sa Muharram 1, 1444H.
Subay sa Article 169 sa Presidential Decree (PD) 1083 kon Code of Muslim Personal Laws in the Philippines nga gilagdaan ni Kanhi Pangulong Ferdinand E. Marcos, Sr., giila ang Amun Jadid isip usa ka Muslim legal holiday.
Obserbaran kini sa mga mosunod nga lalawigan ug dakbayan: Basilan, Lanao del Norte, Lanao del Sur, Maguindanao, North Cotabato, Sultan Kudarat, Sulu, Tawi-Tawi, Zamboanga del Norte, Zamboanga del Sur, Cotabato City, Iligan City, Marawi City, Pagadian City, ug Zamboanga City.
Mamahimo usab kining ideklara sa Presidente nga holiday sa uban pang mga lalawigan ug dakbayan pinaagi sa proklamation matud sa Article 170 sa PD 1083.
Sama sa uban pang Islamic Holidays lakip na ang Eid’l Fitr ug Eid’l Adha, ang National Commission on Muslim Filipinos (NCMF) ug ang Bangsamoro Darul-Ifta’ sa Bangsamoro Autonomous Region in Muslim Mindanao (BARMM), mao’y motakda sa pinal nga petsa sa Amun Jadid subay sa Hijri, o ang Islamic lunar calendar.
Subay sa Article 172 sa PD 1083, ang mga Muslim nga opisyal sa gobyerno ug empleyado nga nagatrabaho gawas sa mga nasangpit na lugar ang tugutan nga dili mo-report sa trabaho aron maobserbaran nila ang holiday. Pinaagi sa usa ka proklamasyon, mamahimong i-require sa Presidente ang mga pribadong opisina nga tugutan nga dili mo-report sa trabaho ang ilang mga Muslim nga empleyado atol sa usa ka Muslim Holiday nga wala’y pagkunhod sa ilang sweldo.