By: Jim Lloyd Dongiapon
Mihatag sa ilang katapusang respeto ang mga Lamiteño ngadto kang kanhi Mayor Rose Furigay sa dihang gilubong na siya karong adlawa, Agosto 3, sa RNR Tennis Court sa Barangay Limo-ok, Lamitan City, Basilan.
Nagsugod ang funeral services alang sa kanhing alkalde pinaagi sa public viewing sa iyang patayng lawas ug usa ka necrological service alas 6:00 sa buntag sa Lamitan City Gym.
Nipatigbabaw ang kasub-anan sa mga Lamiteño sa pagtaliwan sa ilang ginakonsiderang “inahan” sa ilang dakbayan atol sa funeral services alang kaniya. Daghan pa unta ang buot muapil sa lubong apan wala na gitugutan pa nga makasulod tungod sa ginapatumang COVID-19 protocols.
Gibalhin ang iyang minatay ngadto sa St. Peter the Apostle Parish Church alang sa funeral mass nga gipahigayon alas 10:00 sa buntag.
Human sa misa, ang lungon sa kanhi alkalde, nga gitabunan og bandila sa Pilipinas, ang gidala sa iyang katapusang pahulayan sa RNR Tennis Court, nga naila usab isip Furigay Tennis Court.
Gihatagan usab siya og 21-gun salute sa mga tropa gikan sa Armed Forces of the Philippines – Western Mindanao Command (AFP-WestMinCom).
Si kanhi Mayor Rose Furigay usa sa tulo ka mga namatay atol sa insidente sa pagpamusil sa Ateneo de Manila niadtong Hulyo 24, nga gihimo ni Dr. Chao Tiao Yumol tungod sa giingong kasugmo niini kalabot sa giingong pagkalambigit sa kanhi alkalde sa illegal drug trade, bisan pa man dunay sertipikasyon gikan sa Philippine Drug Enforcement Agency (PDEA) nga wala siya’y pending nga mga kaso sa iligal nga drugas.
Ang uban pang mga biktima mao ang iyang dugay nang executive assistant nga si Victor Capistrano, ug ang security guard nga si Jeneven Bandiala.
Ang iyang anak nga si Hannah Furigay, kinsa mutambong unta alang sa iyang paggradwar isip Juris Doctor, nakaluwas sa maong insidente sa pagpamusil ug kasamtangang nagpaalim gikan sa iyang mga samad-pinusilan.