By Jim Lloyd Dongiapon
––
Nagpagula na ang Davao Regional Trial Court (RTC) Branch 17 og Precautionary Hold Departure Order (PHDO) batok kang Dr. Marvin Rey Andrew Pepino, ang akusado sa pagpamusil sa 19-anyos nga si Amierkhan Mangacop niadtong July 2, 2022, gawas sa Lugar Cafe and Bar sa Tavera, Davao City.
Gilagdaan ni RTC Branch 17 Acting Presiding Judge Emmanuel Carpio ang PHDO niadtong Martes, Hulyo 26.
Gimanduan sab sa korte ang paghatag og kopya sa PHDO ngadto sa Department of Foreign Affairs (DFA) ug sa Bureau of Immigration (BI) sa Manila ug Davao, ug gimanduan sila nga hunungon ug pugngan ang akusado sa pagbiyahe pagawas sa nasud ug i-apil iyang ngalan sa ilang Hold Departure List.
Karong adlawa, Hulyo 27, nadawat na sa Mangacop legal team ang kopya sa mando. Kahinumduman nga niadtong Hulyo 22, pormal silang mihangyo sa korte nga magpagula og PHDO batok kang Pepino sanglit gikahadlukan nila nga mutakas gikan sa ligal nga prosekusyon ang akusado pinaagi sa pagbiyahe pagawas sa nasud.
Sa iyang ika-32 nga adlawng natawhan niadtong Hulyo 21, nahatagan og temporaryong kagawasan si Pepino human magbayad og ₱180,000 nga piyansa alang sa homicide ug sa kalapasan sa Republic Act 10591 tungod sa pagdala og armas gawas sa iyang pinuy-anan nga wala’y permit.
Samtang, ang legal team sa pamilyang Mangacop, nga gipanguluhan ni Atty. Gibb Andrew Cabahug, nagduso og motion for reconsideration human gipaubsan ang kaso gikan sa murder ngadto sa homicide.
Mihangyo usab sila og clarificatory hearing kuyog sa Office of the City Prosecutor (OCP) kalabot sa maong butang.
Kalabot niini, mitugot ang RTC Branch 17 sa ilang mosyon nga giduso niadtong Hulyo 22 aron isuspinde ang pagdungog sa kaso sulod sa 60 ka adlaw sa dihang ginapaabot pa ang resolusyon sa ilang motion for reconsideration. Ang pagdungog sa kaso subling gitakda sa Setyembre 22, 2022.
Sa usa ka pamahayag, naglaum ang pamilyang Mangacop nga ang OCP “mag-review sa kaso nga patas ug dunay panagsama.” Nangayo usab sila og pag-ampo ug suporta gikan sa tanan sa ilang gihulagway nga “David-vs.-Goliath fight for justice.”
“The Family would like to believe that there is still justice in the Philippines and that justice be done though the heavens fall, (Buot sa pamilya nga motuo nga duna pa gihapo’y hustisya sa Pilipinas ug mahatag ang hustisya bisan pa man mahugmak ang mga langit),” matud sa ilang pamahayag.