By: Jim Lloyd Dongiapon
Gipadayag ni Lamitan City, Basilan Mayor Oric Furigay atol sa pag-abot sa patayng lawas sa iyang mitaliwang asawa, si kanhi Lamitan Mayor Rose Furigay, nga andam ang lokal nga panggamhanan nga muhatag og security escort alang kang Mrs. Muykim Yumol kon makahukom kini nga mubalik sa siyudad gikan sa Maynila.
“I will even give her a security guard, I will give her [a] police [escort], kung iyan ang gusto nila. Walang problema iyan (Hatagan pa nako siya og security guard. Hatagan nako siya og pulis, kung mao na ilang gusto. Wala’y problema niana),” ingon ni Mayor Furigay.
Si Mrs. Yumol ang asawa ni Rolando “Bobong” Yumol, kinsa gipusil-patay gawas sa ilang pinuy-anan niadtong Hulyo 29, ug inahan ni Dr. Chao Tiao Yumol, suspek sa pagpamusil sa Ateneo de Manila niadtong Hulyo 24.
Sa usa ka pakighinabi, mipaambit siya nga nameligro na ang kinabuhi sa ilang pamilya human sa kamatayon sa iyang bana nga si Bobong.
Nangayo usab siya og tabang ngadto kang Presidente Ferdinand “Bongbong” Marcos, Jr. sanglit nakabati na sila og hulga sa ilang kinabuhi gumikan sa grabeng kahimtang karon sa ilang pamilya.
Sa pikas bahin, miingon si Mayor Furigay nga dili batasan sa mga Lamiteño nga ipas-an ngadto sa mga ginikanan ang sala sa ilang mga anak. Gani, nanawagan pa siya og malawmong imbestigasyon sa mga kasong gikalambigitan sa duha ka partido.
“Naniniwala tayo sa hustisya. Naniniwala tayo sa batas. (Nagatoo ta sa hustisya. Nagatoo ta sa balaod.) I will request a full blown investigation itong nangyayari sa amin at sa kanila (Mohangyo ko og malawmong imbestigasyon kalabot sa gapanghitabo sa amoa ug sa ilaha),” dugang sa Mayor.
Samtang, gihaya karon si kanhi Mayor Rose Furigay sa panimalay sa ilang pamilya sa Barangay Malinis.
Wala pa’y detalye kung kanus-a ipahigayon ang lubong sa kanhi Mayora.