By: April Therese Tan
Ang kagamhanan sa Cebu Province manghatag og libreng antigen test kits alang sa mga maestra sa probinsiya nga dili bakunado batok COVID-19.
Kini human nidonar ang usa ka pribadong kumpaniya, ang Limdaqui Trading Inc. og 10,000 ka antigen test kits ngadto sa kagamhanan sa Cebu Province.
“You will be given priority. You will be able to take the antigen test for free,” matud pa Cebu Governor Gwendolyn Garcia ngadto sa mga dili bakunado nga maestra nga nitambong sa turnover sa antigen test kits didto sa Kapitolyo.
Nagpasalamat usab ang gobernadora ngadto nila Leslie and Charles Lim sa maong donasyon nga makatabang og dako sa mga dili bakunado nga mga maestra.
“We are honored to share our products especially on health issues. We are so proud to be part of this program,” matud pa ni Leslie Lim.
Ang gobernadora, sa iyang mensahe nga naa sa ilang Sugbo News Facebook page, maoy nahimong tingog alang sa nga indibidwal nga dili buot magpabakuna batok sa COVId-19 labi na sa mga maestra.
Matud pa ni Garcia ang pagpabakuna batok COVID-19 dapat usa kini ka personal nga desisyon og angayan nga respituhon.
Dugang pa ni Garcia, ang lagda nga nagmando nga ang mga maestra nga dili bakunado mo presenta og negative COVID-19 test sa dili pa mosulod sa tunghaan, dili makatarunganon ug dugang nga kahasol lang kanila og sama na kini sa usa ka silot.
Matud pa ni Garcia, ang kwarta nga gamiton sa mga maestra alang sa pagpalit og antigen test kits pwede na kini gamiton sa ubang panginahanglanon labi na nagmahal na ang mga palaliton sama sa lana.
Si Dr. Salustiano Jimenez, ang regional director sa Department of Education-7 nga nitambong usab sa maong turnover, nagpasalamat sa gobernadora.
Dugang pa ni Jimenez, ang maong donasyon usa kini ka “answered prayer” kay ang mga maestra makadawat na og libreng antigen test kits.