Ang Land Transportation Franchising and Regulatory Board-7 nimando ngadto sa mga operator sa Modern Public Utility Jeepneys sa Cebu nga mobalik na sila sa ilang karaang ruta sugod karong adlawa, Nobyembre 1, 2021.
Si LTFRB-7 regional director Eduardo Montealto Jr. niluwat sa iyang Regional Office Order No. 2021-R7-06 nagkanayon nga ang mga nahatag na nga special permits automatiko kini ma renew apan dapat mobalik gyud sila sa ilang naandan nga ruta.
Sa pagka karon, ubos sa Level 2 status ang gi implementar sa siyudad sa Cebu, Mandaue ug Lapu-Lapu lakip na ang Cebu Province, ang rason ngano kinahanglan modagan na gyud sa ilang orihinal nga mga ruta ang mga MPUJs.
Tungod kay gikinahanglan ang serbisyo sa mga MPUJs, matud pa ni Montealto nga ang iyang opisina mohatag og special permits tungod sa taas nga demanda sa mga pasahero sa ubang mga ruta ug dili kini magsapaw sa 25 porsiyento sa anaa na nga ruta.
Dugang pa ni Montealto nga ang tanang special permits nakanselar kung ang operator niini adunay wala mabayri nga mga paglapas.
Nagkanayon si Montealto nga human Nobyembre 15, 2021, ang tanang special permits kanselado na kung wala laing paglugway nga luwatan ang iyang opisina.
(By: April Therese Tan)