Share:

By Jim Lloyd Dongiapon
––

Gi-aprubahan sa Sangguniang Panlalawigan sa Maguindanao, atol sa ilang 5th Regular Session karong adlawa, Agosto 24, ang hangyo sa Provincial Government nga ipailalom ang tibuok probinsya state of calamity tungod sa epekto sa pagbaha sa mga milabayng adlaw.

Ayha pa niini, unom ka mga munisipalidad na ang una na nga nadeklara og state of calamity sa ilang mga lokalidad, nga mao ang Datu Montawal, Pagalungan, Kabuntalan, Sultan Kudarat, Datu Piang, ug Datu Odin Sinsuat.

Gawas pa sa unom ka mga mga munisipalidad, gilauman usab nga magdeklara og state of calamity bisan unsa nga oras ang uban pang mga munisipalidad, sumala ni Vice Governor ug Sangguniang Panlalawigan Presiding Officer Bai Ainee Sinsuat.

Gipamalita ni Maguindanao Provincial Disaster Risk Reduction and Management Office (PDRRMO) Head Nasrullah Imam ngadto sa provincial board nga karong Agosto 24, 105 ka mga barangay, nga katugbang sa 46,922 ka mga panimalay o 234,610 ka mga indibidwal, ang naapektohan sa pagbaha sa probinsya.

Gilauman usab nga musaka pa ang maong ihap sanglit ginapaabot pa nila ang mga bag-ong mga taho gikan sa mga municipal DRRMO.

Human sa deklarasyon sa state of calamity, ginaandam na sa Maguindanao Provincial Government ang pagpang-apod-apod og relief packs ngadto sa mga apektadong residente.

Gihambin usab ni Sinsuat nga gawas sarelief packs, mamahimong maka-avail ang mga empleyado sa gobyerno og calamity loans gikan sa Home Development Mutual Fund o Pag-IBIG ug sa Government Service Insurance System kon GSIS.

Samtrang, ginasuta na karon sa lalawiganong panggamhanan ang kadaot sa agrikultural nga mga pananom sama sa mais ug palay tungod sa pagbaha.

Leave a Reply