By Jim Lloyd Dongiapon
––
Gikumpirma Martes sa hapon, Hulyo 12, sa legal team sa Mangacop clan, nga gipangunahan ni Atty. Gibb Andrew Cabahug, nga pormal nang mihangyo ang pamilya ngadto sa National Bureau of Investigation (NBI) XI aron magpahighayon og postmortem examination sa patayng lawas ni Amierkhan.
Sa usa ka pamahayag, miingon ang legal team nga nagpanuko pa sa una ang pamilya nga muhangyo og awtopsiya tungod sa mga hinungdang relihiyoso ug kultural.
“But in the quest to fight for justice for the death of Amierkhan, the Mangacop Clan acceded to the exhumation (of his body) (Apan, alang sa tinguha nga makigbugno alang sa hustisya sa kamatayon ni Amierkhan, miuyon ang Mangacop Clan sa paghakad sa iyang lawas),” dugang sa pamahayag.
Niadtong Biyernes, Hulyo 8, gikumpirma sa NBI XI nga magpahigayon sila og himulag nga imbestigasyon sa pagpatay kang Amierkhan. Dugang pa ni NBI XI Spokesperson Ely Liano, aduna sila’y 10 ka adlaw aron tuki-on pag-ayo ang kaso nunot sa mando sa Office of the City Prosecutor.
Sa laing bahin, nipadayag og hingpit nga suporta si Police Brigadier General (PBGen.) Benjamin Silo, Jr., Director sa Police Regional Office (PRO)-Davao, sa himulag nga pagsusi sa NBI, ug misulti nga ang duha ka ahensya adunay samang tumong sa paghatag og kamatuoran ngadto sa nasugmatang partido.
Mapasalamaton usab ang pamilya ug mga higala ni Amierkhan sa pamahayag ni Silo. Naglaum usab sila nga human sa maong pamahayag, makigkooperar na ang pulisya ngadto sa NBI pinaagi sa paghatag sa mga ebidensya, mga report, ug uban pang mga dokumento nga gikinahanglan sa ahensya alang sa pagsusi nila sa nasangpit nga krimen.
Si Amierkhan Mangacop, edad 19, gipusil ni Dr. Marvin Rey Andrew Pepino, usa ka non-uniformed personnel sa PRO-Davao, 10 ka adlaw na ang milabay gawas sa Lugar Cafe and Bar sa Davao City human ang kagubot sa maong establisamento.