By Jim Lloyd Dongiapon
––
Ang pamilya Mangacop, pinaagi sa ilang abogado nga si Atty. Gibb Andrew Cabahug, mikumpirma karong adlawa, Hulyo 22, nga magduso sila og motion for reconsideration sa Office of the City Prosecutor (OCP).
Kini human gipaubsan sa OCP ang kaso batok kang Dr. Marvin Rey Andrew Pepino gikan murder ngadto sa homicide niadtong Miyerkules, Hulyo 20.
Nagpiyansa na usab si Pepino alang sa kasong homicide ug sa paglapas sa Section 31 sa Republic Act (RA) 10591 kon Comprehensive Firearms and Ammunition Regulation Act kagahapon, Hulyo 21, nga naatol sab sa adlaw sa iyang ika-32 nga adlawng natawhan.
Gikumpirma usab ni Atty. Cabahug nga ang OCP nagduso na kagahapon og mosyon ngadto sa Regional Trial Court Branch 17 alang sa pagpagula og precautionary hold departure order batok kang Pepino.
Malaumon ang pamilya nga dunay hustisya sa prosesong hudisyal, ug ang mga panghitabo ning bag-ohay lang gamay lamang nga kapakyasan sa ilang pagsuhid sa pagkuha og hustisya alang sa kamatayon ni Amierkhan.
Naglaum usab sila nga makadawat og “pa-birthday” si Amierkhan, nga mag-20 anyos na unta karong Hulyo 23, sama na lang sa suspek nga nakadawat niini usa ka adlaw ayha ang iyang adlawng natawhan.
Sa laing bahin, ang OCP wala pa nagpagawas og opisyal nga pamahayag kalabot sa maong butang.