By Jim Lloyd Dongiapon
––
Miduyog ang Mindanao Kokusai Daigaku (MKD), kon Mindanao International College, sa mga Hapon sa pagsubo sa kamatayon sa kanhi ug labing dugay nga nagsilbing Prime Minister Shinzo Abe..
Gi-anunsyo Dominggo sa gabii, Hulyo 10, sa MKD pinaagi sa ilang official Facebook page nga sila mag-obserbar og tulo ka adlaw nga pagsubo, sugod Lunes, Hulyo 11, hangtod, Miyerkules, Hulyo 13.
Gi-ablihan sa institution ang usa ka memorial area sa ilang entrance lobby diin mahatagan og higayon ang publiko nga makahatag og respeto sa mitaliwang Japanese leader ug aron makapirma sa “book of sympathy.”
Ang pagpirma sa book of sympathy abli gikan alas 9 sa buntag hangtod alas 4 sa hapon.
“MKD hopes to be a place and space of comfort for all Nikkeijin (Japanese descendants) and the rest of the Davao City community during this time of remembrance and mourning (Ang MKD naglaum nga mamahimong lugar ug luna sa kaharuhay alang sa tanang mga Nikkejin (Japanese descendants) ug sa ubang mga komunidad sa Davao City niining panahon sa paghandum ug pagsubo),” matud sa MKD sa ilanga anunsyo.
Ang MKD, uban sa Philippine Nikkei Jin Kai International School (PNJKIS), ang nahimong kabahin sa itinerary ni Abe atol sa iyang pagbisita sa Davao City, usa sa mga dagkong komunidad sa mga Nikkeijin sa Pilipinas, niadtong Enero 13, 2017. Kini, alang kanila, usa ka kahigayonan nga wala’y katapusan nilang pasalamatan.
“MKD will never forget the humility and sincerity that he had shown to all of our school officials, teachers, students, and parents during his historical and very memorable visit to our college. May Abe-sama rest in peace and condolences to everyone in his wonderful homeland (Dili malimtan sa MKD ang pagkamahinubsanon ug katim-os nga iyang gipakita ngadto sa mga opisyal sa eskwelahan, mga magtutudlo, mga magtutungha, ug mga ginikanan atol sa iyang makasaysayon ug labing halandumong pagbisita sa among kolehiyo. Hinaut nga makapahulay sa kalinaw si Abe-sama ug among pahasubo sa tanan sa iyang matahum nga yutang natawhan) ,” sumala sa MKD human makabalita sa pagkamatay ni Abe.
Si Abe, edad 67, gipatay Biyernes, Hulyo 8, pasado alas 11:30 sa buntag oras sa Japan (alas 10:30 sa buntag oras sa Pilipinas) samtang nagahimo kini sa iyang campaign speech sa Yamato-Saidaiji Station sat Nara City, Nara Prefecture. Gideklara siyang patay alas 5:03 sa hapon oras sa Japan (alas 4:03 sa hapon oras sa Pilipinas) sa samang adlaw.
Gipusil siya sa makaduhang higayon ni Tetsuya Yamagami, 41, kanhi miyembro sa Japanese Maritime Self-Defense Force, gamit ang usa ka hinagibang hinimo sa balay. Sumala sa mga imbestigador, ang motibo niya personal kay sa politikal. Gipasakaan na og kasong murder si Yamagami human ang insidente.