By Jim Lloyd Dongiapon
Ipahigayon sa National Cacao Congress ang unang in-person conference niini sukad sa pag-igo sa COVID-19 pandemic ugmang adlawa, Nobyembre 24, sa SMX Convention Center sa Lanang, Davao City, ug molungtad kini hangtod Biyernes Nobyembre 25.
Gipasiugdahan kini sa Philippine Cacao Industry Association (PCIA), Philippine Cacao Industry Council (PCIC), Department of Agriculture (DA), Department of Trade and Industry (DTI), ug sa Department of the Interior and Local Government (DILG).
Mahatagan og higayon ang mga mag-uuma sa cacao ug sa uban pang nalambigit sa industriya niini aron mangita og suporta ngadto sa lain pang mga partisipante, ingon man sa pagsusi sa suplay ug panginahanglan sa Philippine cacao sa lain-laing mga merkado, ug aron mahisgutaan ug mapaayo pa ang ilang mga estratehiya sa malamboong industriya sa cacao.
Gitumong usab sa maong pagpasundayag nga pakusgan pa ang posisyon sa Davao City isip Chocolate Capital ug sa tibuok Davao Region isip Cacao Capital of the Philippines, subay sa deklarasyon sa Republic Act 11547 of 2021, nga gilagdaan ni kanhi Presidente Rodrigo Duterte.
Gibutyag niadtong Nobyembre 7 ni Charita Puentespina, founder sa Puentespina Farms ug Malagos Chocolates ug PCIA trustee, nga 70 ka exhibitor ug kapin 1,800 ka mga partisipante ang gilaumang mosalmot sa maong kalihokan.
Samtang, mipaambit si Delia Ayano, assistant regional director sa DTI-Davao, nga ang tema sa pagpasundayag karong tuiga mao ang “Cacao is Gold,” sanglit nagsugyot kini og “maginansyahong” mga oportunidad alang sa mga nalambigit sa industriya sa cacao.
Gilauman sab nga mohatag sa ilang mga pamulong atol sa maong panagtapok sila Presidente Ferdinand “Bongbong” Marcos, Jr., Bise Presidente “Inday” Sara Duterte, Davao City Mayor Sebastian “Baste” Duterte, PCIC Chairperson Armi Lopez-Garcia, ug Senator Cynthia Villar, ang labaw sa Senate Committee on Agriculture and Food.
Sa laing bahin, i-anunsyo sab sa maong panagtigom ang unom (6) ka mga mananaog sa Philippine Cacao Quality Awards (PCQA) 2022, nga gipahigayon niadtong Oktubre 25–28, 2022, sa Butuan City. Sila usab ang morepresentar sa nasud ngadto sa International Cocoa Awards nga ipahigayon sa Salon du Chocolat sa Paris, France, sunod tuig.