By Jim Lloyd Dongiapon
61 porsyento nang nahuman ang 3.17 kilometros nga Panguil Bay Bridge, nga mao’y pinakataas nga sea crossing bridge sa Northern Mindanao, sumala sa pamahayag sa Department of Public Works and Highways (DPWH) Huwebes, Disyembre 8.
Gikaingon ni DPWH Secretary Manuel Bonoan nga padayon ang ilang pakigkoordinar sa mga contractor aron mapapaspasan ang konstruksyon sa tulay ug makompleto kini pag-abot sa Disyembre 2023, nga mao ang gi-target nga completion date niini.
Ang tulay mokonekta sa Tangub City sa Misamis Oriental ngadto sa lungsod sa Tubod sa Lanao del Norte. Kung makumpleto na kini, mamenosan na ang duha ka oras nga biyahe tali sa duha ka probinsya ngadto na lamang sa pito ka minuto.
Dugang pa niini, ang pagpatukod niini gipondohan pinaagi sa ₱7.375 billion loan agreement tali sa gobyerno sa Pilipinas ug sa Korean Export Import Bank, segun ni DPWH senior undersecretary Emil Sadain.
Pagpadayon niya, ang maong proyekto kabahin sa programang “Build Better More” sa kasamtangang administrasyong Marcos.
Ang konstruksyon sa Panguil Bay Bridge gisugdan niadto pang Pebrero 2020, apan nalangan kini tungod sa restriksyon sa trabaho, hatod sa pandemya, mga problema sa material ug supply chain, mas taas nga panahon alang sa pagdisyeno, ug pagkadelatar sa pag-abot ug pagpagawas sa mga ekipo gikan sa gawas sa nasud.
Human nasulbad ang mga kalangan, nagsugod na ang pag-arangkada sa konstrusyon human sa pagtiwas sa 54 ka bored piling works, nga mao’y nagtugot sa pagtukod sa 36 ka abutment ug pier column, 32 ka coping, ug ang pagsugod sa incremental launching method (ILM) sa maong superstructure sa kinatumyan niini nga nahimutang sa Tubod ug Tangub City.
Samtang gibanabanaang kapin 336 ka trabahante ang nagatrabaho sulod sa 24 oras aron mahuman ang proyekto pag-abot sa Disyembre 2023, dunay natala nga pagkalangan sa pagtukod sa tulay sa ulahing quarter sa tuig 2022, gumikan sa kanunay nga pag-ulan sa rehiyon ug sa kusog nga sulog kon pagbalod sa Panguil Bay.
Bisan pa man niini, malaumon gihapon si Sadain nga makompleto kini sulod sa gitakdang panahon.