By: Jim Lloyd Dongiapon
Gikataho sa lokal nga pulisya sa lungsod sa Maco, Davao de Oro, karong adlawa, Nobyembre 10, nga ilang nasikop niadtong Miyerkules, Nobyembre 9, ang usa ka giingong pastor tungod sa mga kasong dunay kalabotan sa pagpanglugos isip kabahin sa ilang operasyong “Manhunt Charlie.”
Giila ni Police Major (PMaj.) Madtaib Jalman, Acting Chief sa Maco Municipal Police Station (MPS), and sad-an nga si “Pastor Jhan,” 34, residente sa Barangay Binuangan sa samang lungsod ug gikonsidera isip “Most Wanted Person” sa maong dapit.
Segun ni Jalman, gidakop ang akusado pinaagi sa usa ka mandamento de aresto alang sa lima (5) ka ihap sa pagpanglugos ug upat (4) ka ihap sa lascivious conduct ilawom sa Sec. 5(B) sa Republic Act (R.A.) No. 7610, nga naila usab isip Special Protection of Children Against Abuse, Exploitation, and Discrimination Act.
Dugang niya, anaa na karon ang suspek sa ilang kustodiya.
Ang nasangpit nga operasyon usa ka hiniusang pagpaningkamor sa Maco MPS, Regional Maritime Unit XI, Regional Special Operation Group XI, sa 1101st Regional Mobile Force Battalion XI, ug sa 2nd Davao de Oro Provincial Mobile Force Company.