By Jim Lloyd Dongiapon
––
Gi-veto ni Pangulong Ferdinand “Bongbong” Marcos, Jr. ang House Bill No. 10554, nga nagtinguha sa pagpalapad sa franchise area sa Aboitiz-owned Davao Light and Power Company (DLPC) sa mga lugar nga kasamtangang ginaserbisyohan sa Northern Davao Electric Cooperative (NORDECO), nga kanhi nailhang Davao del Norte Electric Cooperative (DANECO).
Sa usa ka sulat nga gitumong ngadto sa duha ka Balay-Balaoranan sa Kongreso nga dunay petsang Hulyo 27, 2022, gihisgot ni Pangulong Marcos ang Presidential Decree 269 aron ipatugbaw ang kamahinungdanon sa kinatibuk-ang elektripikasyon sa Pilipinas ngadto sa kaayohan sa katawhan ug sa maayong kalamboan sa nasud.
“I remain committed to the pursuit and attainment of this objective in a vigorous and systematic manner, with utmost respect for the concomitant rights of the public service entities engaged in supplying electric service (Magpabilin akong pagsalig ngadto sa pagtinguha ug pagkab-ot niining mga tumong sa kusog ug sistematikong pamaagi, uban sa tumang pagtahod sa mga katungod sa mga serbisyo publiko nga mga entidad nga nalambigit sa pagsuplay sa serbisyo sa kuryente),” sumala ni Pangulong Marcos.
Gihisgutan usab niya nga samtang ginaila niya ang katuyoan sa gisugyot nga balaodnon aron mapauswag ang akses sa publiko sa kuryente, iyang gi-veto ang balaodnon “tungod sa pagkasensitibo sa gidusong pagpalabad sa franchise area sa Davao Light and Power Company, Inc. sa mga ligal ug/o konstitusyonal nga hagit tungod sa dayag nga pagsapaw ug posibleng paglapas sa mga naglungtad nga prangkisa, permit, ug kontrata nga gihatag kaniadto sa North[ern] Davao Electric Cooperative Inc.”
Giila usab niya nga ang mga kasamtangang prangkisa nga gihatag ngadto sa NORDECO ang gikatakda nga matapos sa 2028 alang sa Mainland Davao del Norte ug sa 2033 alang sa Island Garden City of Samal (IGACOS).
Dugang pa niya, makalapas ang sugyot sa Section 27 sa Republic Act (RA) 9136 o EPIRA Law, nga nagamando nga “tugutan ang tanang mga prangkisa sa ilang tibuok termino,” ug ang non-impairment clause nga gitagana sa Section 10, Article III, kon Bill of Rights sa 1987 Constitution.
Samtang, Miingon sa usa ka pakighinabi sa radyo niadtong Huwebes, Hulyo 28, si Samal Island Mayor Al David Uy, usa sa mga prominenteng tingog pabor sa pagpalapad sa prangkisa sa DLPC, nga pormal niyang hangyoon si Davao del Norte 2nd District Representative Alan Dujali nga mag-lobby og laing House Bill aron palapdan ang coverage sa DLPC ngadto sa ubang parte sa Davao del Norte nga kasamtangang ginaserbisyohan sa NORDECO.
Apan, gisugyot ni Uy nga sa pagkakaron, ang maong balaodnon moaplikar lamang sa ilahang dakbayan.
Sa pikas bahin, wala pay opisyal nga pamahayag ang DLPC ug NORDECO kalabot sa gi-veto nga balaodnon.