By: Jim Lloyd Dongiapon
Mugnaon ang usa ka special investigation task group (SITG) aron susihon ang kamatayon sa negosyante ug modelo nga si Yvonne Plaza Chua, matud sa pamahayag sa Police Regional Office (PRO) XI niadtong Biyernes sa gabii, Disyembre 30.
Segun sa PRO XI, pagamugnaon kini subway sa hangyo sa Davao City Police Office.
Kahinumduman nga gipusil-patay si Chua atubangan sa iyang ginarentahang balay sa Buttercup Street, sulod sa Green Meadows Subdivision saTugbok District, Davao City, niadtong Miyerkules, Disyembre 28 pasado alas 7:25 sa gabii.
Sa pikas bahin, mikatap sa social media ang mga hungihong mahitungod sa mga hinungdan sa iyang kamatayon.
Usa ka user sa social media ang nangagpas nga si Brigadier General Jesus P. Durante III, commander sa 1001st Brigade sa Philippine Army, ang mao’y mipatay kaniya.
Gipaambit usab sa maong user ang screenshot sa post ni Chua sa dili matinong petsa, nga miingong, “Jes durante did this to me,” nga mipunting sa nahilakip nga mga hulagway sa iyang nabun-og nga nawong ug naghubag nga ngabil, nga nagpasabot nga dunay pisikal nga kadaot o pag-abuso nga gibuhat kaniya.
Sa pagsulat niining balita, wala pa’y gipagula nga pamahayag si Durante agig tubag sa mga pamasangil.
Samtang, dunay lain pang hungihong nga nagakaylap sa social media nga miangkon nga dunay kasungian tali sa biktima ug sa mamumusil human nga giingon mibangga ang Montero Sport sa biktima ngadto sa motorsiklo sa suspek.
Iya kuno nga gitunglo ug gisensyasan ang mamumusil gamit ang iyang tungang tudlo, nga mao’y gikalagot sa suspek. Mihangyo ang kauban sa mamumusil nga makig-areglo na lang ang biktima pinaagi sa pagbayad alang sa danyos, apan giingong giinsulto na hinuon niya kini hinungdan nga gipusil siya sa mamumusil sa makadaghang higayon.
Usa ka screenshot sa giingong CCTV footage ang nigawas sa social media, nga nagpakita sa gunman nga mopusil kang Chua. Wala pa makompirmar sa kapolisan ang pagkatinuod niini.
Taliwala sa mga hungihong sa social media, ang pag-umangkon ni Chua nga si Naina Morata, niawhag sa mga netizen nga hunongon na ang pagpakatap og sayop nga impormasyon bahin sa kamatayon sa iyang iyaan.
“[On] behalf of [the] Chua Family, please stop spreading false allegations and rumors about the cause of my tita’s death; we, the relatives and her family, are in mourning; please respect her parents and siblings (Sa ngalan sa pamilya Chua, palihog undangi na ang pagpakatag og bakak nga mga alegasyon ug hungihong mahitungod sa hinungdan sa kamatayon sa akong tita; kami, ang mga paryente ug iyang pamilya, nagbangotan; palihog respetoha ang iyang mga ginikanan ug mga igsuon),” sulat ni Morata sa ang iyang karon pribado na nga post.
“Instead of spreading rumors, please pray for her soul. Pati po kami, clueless, walang idea. In shock kami (Inay nga magpakatap og tsismis, palihog i-ampo na lang iyang kalag. Pati kami wala’y ideya. Nakugang pa kami),” dugang niya.