Share:

By: By: Jim Lloyd Dongiapon

Gikumpirma ni Police Major (PMaj.) Maria Teresita Gaspan, tigpamaba sa Davao City Police Office (DCPO) atol sa AFP-PNP Press Corps Southern Mindanao media briefing karong adlawa, Seyembre 2, nga dunay “puti nga van” nga nagalibot sa Dakbayan sa Davao dili aron mangdagit kung dili aron mangsalbar og mga bata nga nagalatagaw sa kadalanan, ilabi na sa kagabhion.

Gipanag-iyahan sa City Government of Davao ang maong puti nga van, nga dunay logo sa “Davao: Life is Here,” ug ginagamit sa City Social Welfare and Development Office (CSWDO) ug sa Women’s and Children’s Protection Desk (WCPD) sa DCPO, ang mga ahensya nga nagapaluyo sa mga lakang sa pagsalbar.

Dugang pa ni Gaspan, kabahin kini sa ilang gipakusgang pagpatuman sa curfew hours alang sa mga menor de edad ug sa kampanya sa dakbayan labot sa anti-mendicancy aron panalipdan ang kabatan-onan gikan sa kadaotan.

Ang mga nasalbar nga mga menor de edad ginadala sa Quick Response Team for Children’s Concerns facility o di kaha ginauli ngadto sa ilang mga ginikanan o mga legal guardian.  

Samtang, sa nahaunang pamayahag, gikumpirma usab ni Police Regional Office (PRO) XI spokesperson PMaj. Atty. Eudisan Gultiano ang paglungtad sa puti nga van nga ginagamit sa pagluwas sa mga bata.

Nagpadayon sa pag-ingon si Gultiano nga ang puti nga van sa dakbayan pakyas nga makaluwas og mga batan-on sa milabayng mga adlaw sanglit managan sila inig kakita nila sa maong sakyanan. Gituohang hatod kini sa pagkaylap sa mga peke nga balita sa mga insidente sa pagpangdagit nga naglambigit sa usa ka puti nga van.

Sa pikas bahin, gipahimangnuan sa opisyal ang tanan nga dili dayon mag-post sa Facebook kung duna sila’y miyembro sa pamilya nga nawala sulod na sa duha ka oras sanglit ang paghimo niini mamahimong hinungdan sa pagkaalarma o di kaha pagkahadlok sa publiko. Kini nga tambag gihimo aron pakahisgutan ang mga gikatahong nangawala nga mga tawo sa sa dakbayan. 

Giawhag niya ang tanan nga moadto sa pinakaduol nga istasyon sa pulis aron maaksyunan dayon ang ilang mga mulo ug aron malikayan ang sayop nga pag-asoy sa mga pagpangdagit nga diay to nakigkita ra sa mga kaila o di kiha mikakaw ra sa ilang balay human nga gikasab-an sa mga ginikanan. 

Leave a Reply