By Jim Lloyd Dongiapon
–
Gikumpirma sa Western Mindanao Command (Westmincom) of the Armed Forces of the Philippines (AFP) Martes sa buntag nga ilang napatay ang tigpamaba sa Islamic State of Iraq and Syria-East Asia (ISIS-EA) sa Maguindanao kagahapon sa hapon, Hunyo 6.
Giila sa Westmincom ang napatay nga si Abdulfatah Omar Alimuden, alias Abu Huzaifah, kinsa nagdumala sa mga pinansyal nga transaksyon tali sa Daulah Islamiyah-Philippines ug ISIS Central.
Matud ni WestMinCom spokesperson Maj. Andrew Linao, gikumpirma sa intelligence ug threat reports nga ilang nadawat gikan sa joint task force sa Central Mindanao ang posisyon ni Alimuden sa ISIS.
Napatay si Alimuden atol sa joint operation sa 601st Infantry Brigade, 40th Infantry Battalion, ug intelligence units sa AFP sa Crossing Salbo, Barangay Poblacion, Datu Saudi Ampatuan, Maguindanao.
Apan, wala na naghatag pa og dugang impormasyon ang Westmincom kalabot sa kung paunsa siya napatay ug kung unsa ang nahitabo atol sa pagpatuman nila sa ilang operasyon.
Gihulagwat ni Linao ang kamatayon ni Alimuden isip “dakong hampak ngadto sa kapabilidad sa Daulah Islamayah Philippines sa paghimo pa og daghang mga bomba ug pagdaot ug kalisang sa atong katilingban.”
Gidayeg ni Westmincom Chief Lieutenant General Alfredo Rosario, Jr. ang mga tropa nga malampusong nakapatay kang Alimuden.
Nailhan sa mga residente sa Maguindanao si Alimuden isip Ustadz Abdulfattah Omar Abdulmaguid, 32 anyos, usa ka negosyante nga nanimuyo sa Bagan, Talayan, Maguindanao.
Sumala sa mga nakasaksi, nagahatod og materyales si Alimuden alang sa ginatukod nga Madrasah sa Crossing Salbo sa dihang gipatay siya sulod sa iyang sakyanan sa mga armadong kalalakinhan nga nakasakay sa usa ka sport utility vehicle (SUV).
Nagtuon si Alimuden og Bachelor of Daawah sa Mu’ata University, Kingdom of Jordan ug nahimong “memorize”r (Hafiz) sa Qur’an.
Miuli siya sa Pilipinas niadton 2018, ug namuyo sa Maguindanao, kung asa siya nagpakasal sa iyang asawa ug duna sila’y duha ka anak.
Wala pay pamahayag ang iyang pamilya ug paryente kalabot sa iyang kamatayon.