By: Jim Lloyd Dongiapon
Gipasa karong adlawa, Hulyo 19, sa 17th Sangguniang Panlungsod sa Dakbayan sa Cotabato ang usa ka resolusyon nga nagaduso sa lokal nga panggamhanan sa dakbayan nga pormal nga ilhon ang pagkalakip niini sa Bangsamoro Autonomous Region in Muslim Mindanao (BARMM) atol sa ilang Third Regular Session sa session hall sa People’s Palace.
Gipaambit kini ni Councilor Marouf “Pabo” Ayunan Pasawiran, tagsulat sa resolusyon, sa iyang opisyal nga Facebook page.
Matud niya, ang resolusyong iyang gisulat ang nagtumong sa pagpalig-on sa relasyon sa siyudad ug BARMM ug sa pagpasiugda sa moral nga pagdumala sa lokal nga panggamhanan.
Ginaawhag usab niini ang tanang buhatan sa gobyerno ug sa publiko nga gamiton ang BARMM isip ilang regional address.
Sumala usab niya, sukad sa BARMM plebiscite niadtong Enero 21, 2019, wala pa pormal nga giila sa siyudad ang pagkalakip niini sa maong autunomous region.
Samtang, sa bahin sa nasudnong panggamhanan, nahimo nang enterong bahin sa BARMM ang Cotabato City sukad niadtong Disyembre 15, 2020 human nga opisyal nga gitugyan sa Department of Interior and Local Government (DILG) ngadto sa Ministry of Interior and Local Government (MILG) BARMM ang administrative control sa siyudad gikan Region 12 ngadto sa BARMM.
Kahinumduman nga atol sa plebisito tulo ka tuig na ang milabay, miboto og “Yes” ang Cotabato City alang sa pagkalakip niini sa BARMM human makakuha og 36,682 nga boto o 59.48 porsyento samtang ang mga boto nga “No” anaa lamang sa 24,994 ka boto o 40.52 porsyento.