By Jim Lloyd Dongiapon
Nakatakdang magpahigayon ang Senado og imbestigasyon kalabot sa pagkamatay sa 24 ka mga sakop sa tribong Teduray atol sa pagdahili sa yuta, tungod sa Severe Tropical Storm “Paeng,” sa usa ka bahin sa Mount Minandar sa Barangay Kusiong, Datu Odin Sinsuat, Maguindanao del Norte niadtong Oktubre 28 ning tuiga.
Atol sa iyang privilege speech niadtong Martes, Nobyembre 22, nahimong emosyonal si Senador Robinhood Padilla dihang nanawagan siya sa iyang mga kaubanan nga motabang sa pagpangita og hustisya alang sa mga biktima sa maong trahedya.
“Hinihingi ko po sa Senado na bigyan po ito ng pansin sapagka’t para saan po tayo kung hindi natin mabigyan ng proteksyon ang mga maralitang katutubo, ano tayo? Tayo na mismo, tayo na ang pumalit sa mga dayuhang mananakop. Tayo na ang kumukuha ng mga taong ito at dinadala natin ito sa kapahamakan (Nagahangyo ako sa Senado nga susion kining butanga tungod kay kung dili nato mapanalipdan ang atong mga katawhang Lumad, unsa pa ba ang atong pulos ngari? Kita mismo ang mihulip sa mga langyaw’ng manunulog. Kita na gani mismo ang nagadala kanila ngadto sa kadaotan),” segun ni Padilla.
Dugang niya, kung dili kini maimbestigahan, dili mamahimong ikagarbo sa mga Pilipino ang ilang kaugalingong bandera kung duna pa’y mga nitibong Pilipino nga ginadaogdaog gihapon sa ilang isig kaingon.
Gusto usab niyang paimbestigahan ang giingong pugsanong pagpamalhin sa mga tawong Teduray ngadto sa usa ka pabalay duol sa Mount Minandar sa usa ka dato nga indibidwal nga buot himuong usa ka seaside resort ang ilang yutang kabilin.
Gisuportaha sa mga miyembro sa Oposisyon nga sila Senadora Risa Hontiveros ug Senador Aquilino “Koko” Pimentel III ang sugyot ni Padilla.
Plano usab ni Padilla nga ipatawag ang mga representante sa tribong Teduray, Datu Odin Sinsuat local government unit, tag-iya sa resort, National Commission on Indigenous Peoples (NCIP), ug ang Ministry of Indigenous Peoples Affairs sa Bangsamoro Autonomous Region in Muslim Mindanao (BARMM) aron sila makapatin-aw sa ilang mga habig atol sa imbestigasyon.