By: Jim Lloyd Dongiapon
Gipailalom ang lungsod sa Surallah, South Cotabato sa state of calamity taliwala sa pagsaka sa mga natalang kaso sa dengue.
Gi-aprubahan sa Sangguniang Bayan sa Surallah ang resolusyon human girekomenda sa Municipal Disaster Risk Reduction and Management Council (MDRRMC) ang maong deklarasyon.
Sumala ni MDRRM Action Officer Leonardo Ballon, tulo ka barangay ang una nang nagdeklara og state of calamity sa ilang mga dapit, nga mao ang Barangays Buenavista, Centrala, ug Dajay.
Gipaambit usab sa opisyal nga nakatala na sila og 50 ka kaso sa dengue gikan Enero hangtod Hunyo karong tuiga, ug nagapadayon usab ang pagsaka sa maong numero.
Ang Barangay Dajay ang dunay pinakadaghang kaso sa nga anaa sa 20, ug gisundan kini sa Centrala ug Buenavista.
Sa laing bahin, wala hinuo’y natalang namatay sa lungsod tungod sa dengue.
Dugang niya, posibleng nakatampo sa pagsaka sa kaso sa dengue sa Surallah ang pagtaas sa gidaghanaon sa ulan karong bulana.
Nagabuhat na og mga lakang ang Surallah Municipal Health Office aron mapugngan ang dengue outbreak sama sa cleanup drives ug fogging, ilabi na sa mga dapit nga dunay clustering sa mga kaso.
Gi-awhag sab ni Ballon ang mga residente sa ilang lungsod nga tabangan ang lokal nga panggamhanan aron mabatukan ang pagkatap sa dengue pinaagi sa 4S, kon Search and Destroy, Self-Protection Measures, Seek Early Consultation, ug Say “Yes” to Fogging only during Outbreaks.
Samtang, miingon si South Cotabato Integrated Provincial Health Office chier Dr. Rogelio Aturdido, Jr. nga usa ka “endemic year” sa dengue ang tuig 2022.
Matud pa niya, ang dengue outbreak sa probinsya sa South Cotabato, nagapanghitabo sulod sa tulo ka tuig nga sikulo.