Ang tibuok isla sa Cebu nakatala og 9,542 ka bag-ong kaso sa COVID-19 ug adunay 944 ang nitaliwan sugod Septyembre 1 hangtud 30 ning tuiga.
Matud pa sa Department of Health-7 sa ilang matag adlaw nga bulletin sa COVID-19, nga ang Cebu Province maoy labing pinakadaghan og kaso diin naa kini 4,515. Gisundan kini Cebu City, 2,634; Lapu-Lapu City, 1,341; ug Mandaue City, 1,051.
Kabahin sa namatay tungod sa maong sakit, matud pa sa maong datos nga ang Cebu Province adunay 611; Cebu City, 211; Lapu-Lapu City, 67; ug Mandaue City, 55.
Nakita usab sa maong datos nga sugod sa pandemya adtong usang tuig hangtud Setyembre 30, 2021, adunay tutal nga 35,881 nga natakdan sa maong sakit sa Cebu Province, apan 31,513 niini ang naayo na ug 2,176 ang aktibong kaso. Adunay 2,192 nga namatay.
Sa Cebu City, aduna kini 40,322 tutal nga kaso apan 37,846 ang naluwas na sa maong sakit ug adunay tutal nga 1,386 ang namatay. Adunay pay aktibong kaso nga 1,090.
Ang Lapu-Lapu City adunay aktibong kaso nga 985. Naa kini tutal nga 13,337 ka kaso apan 11,127 niini ang naluwas na ug 382 niini ang nitaliwan na.
Samtang sa Mandaue City, nakatala kini og 11,059 nga nakarekober na sa tutal nga 11,928 nga natakdan sa maong sakit. Aduna usab 369 nga nakabsan sa kinabuhi samtang 500 ang nagpabilin nga aktibong kaso. (By: April Therese Tan)