By Jim Lloyd Dongiapon
Gikumpirma sa lokal nga panggamhanan sa munisipalidad sa Shariff Aguak sa Maguindanao del Sur nga hugot na nilang ginapatuman ang rekisitos alang sa tanang babaye nga magsuot og hijab o tendong, usa ka tabon sa ulo nga ginasul-ob sa mga Muslimah aron maalima ang kaligdong ug pribasiya gikan sa mga lalaki nga dili nila kabanay.
Matud ni Datu Anwar Emblawa, ang Secretary to the Mayor, gikan mismo kang Mayor Datu Akmad Ampatuan ang maong direktiba.
Gipagula sa alkalde ang nasangpit nga mandato tungod sa “religious obligation,” dugang ni Emblawa.
Giklaro niya nga ang mga dili Muslim ug mga babayeng biyahero dili sakop sa polisiya sa hijab aron mawala ang kabalaka sa mga babayeng turista nga buot mobisita sa ilang lungsod.
Sa pikas bahin, gilimod sa opisyal ang mga hungihong sa social media nga gidid-an na sa pagpuyo sa ilang lungsod ang mga miyembro sa LGBTIA+ (lesbian, gay, bisexual, transgender, queer, intersex, and more) community.
Gipahimug-at niya ang ang mga pag-angkon nga gibawal na ang mga tawong LGBTQIA+ sa ilang lungsod wala’y kamatuoran ug pulos lamang “fake news”. Gani, sumala niya, gawasnon nga makapuyo sa ilang lokalidad ug makabuhat sa bisan unsa mang gusto nilang buhaton ang mga miyembro sa LGBTQIA+ community.