By: Jim Lloyd Dongiapon
Ginalauman nga itunol karong adlawa, Hulyo 15, sa National Bureau of Investigation (NBI) XI ang tanang nakuhang mga ebidensya, mga gipanumpaang mga affidavit, ug ang resulta sa awtopsiya ngadto sa Davao City Prosecutor’s Office human sa pagpahigayon og himulag nga imbestigasyon sa pagpusil sa 19 anyos nga si Amierkhan Mangacop sa PNP non-uniformed personnel nga si Dr. Marvin Rey Andrew Pepino.
Wala’y nakitang igong basehan ang NBI-XI sa mga inisyal nga taho gikan sa pulisya nga self-defense ang gibuhat ni Pepino atol sa kagubot sa Lugar Cafe and Bar pasado kaadlawon sa Hulyo 2.
Nasuta usab nila nga wala’y kalambigitan ang grupo sa biktima sa gubot gawas sa bar sanglit miadto lang sila didto aron sunduon ang lain pa nilang ig-agaw nga anaa sa tunga sa naunang kagubot nga nahitabo sulod sa establisamento.
Dugang pa, usa ka dili makatarunganong pagpanulong ang gibuhat ni Pepino sanglit ang mga tawo sa bar, lakip si Amier, ang mipalayo na sa maong dapit dihang mihulbot sa iyang armas ang suspek.
Subay sa imbestigasyon, gisulayan pa og ilog sa ig-agaw ni Amier ang pusil gikan sa suspek human sila gitutukan og gibaharang pusilon niini, nga mao’y hinungdanm sa lain pang komosyon nga miresulta sa pagpamusil sa biktima duol sa usa ka police patrol car.
Gibutyag usab sa autopsy report nga nakahiagom og lima ka samad-pinusilan ang biktima, diin duha ka bala ang miigo sa iyang spinal cord ug laing tulo pa ka mga basyo ang nakuha sa uban pang bahin sa iyang patayng lawas.
Sa laing bahin, ang legal team sa Mangacop clan, nga gipanguluhan ni, Atty. Gibb Andrew Cabahug, wala pa’y pamahayag kalabot sa resulta sa imbestigasyon sa NBI XI sa kaso.
Kahinumduman nga pormal nga mihangyo niadtong Hulyo 8 ang Mangacop clan ngadto sa NBI XI nga magpahigayon og himulag nga pagtuki sa kaso tungod dili sila makasalig sa PNP nga makapahigayon kini og patas og wala’y ginabarugang imbestigasyon sanglit ang akusado, usa sa ilang mga sakop. Gipadayag usab nila nga daw nahimong abogado sa suspek ang PNP base na sab sa ilang mga niaging pamahayag sa media.