By Jim Lloyd Dongiapon
Gipahigayon kagahapon, Enero 9, sa undivided Maguindanao province ang ulahing flag-raising ceremony niini sa Provincial Capitol sa Buluan, nga nagpasabot sab sa pagsugod sa operasyon sa Maguindanao del Norte ug Maguindanao del Sur isip himulag na nga local government units (LGUs).
Gipangunahan kini nila Maguindanao del Sur Governor Bai Mariam Sangki Mangudadatu, Maguindanao del Norte Governor Bai Fatima Ainee Sinsuat, kauban ang mga bokal, ug uban pang opisyal.
Gipilo na sab sa katapusang higayon ang bandera sa One Maguindanao ug wala na gipataas pa atol sa seremonya.
Gihulagway kini sa mga Maguindanaon isip “mahinungdanon ug emosyonal nga adlaw” sanglit wala na ang ilang nailhang One Maguindanao Province.
Human sa katapusang flag-raising ceremony, gipahigayon ang usa ka open forum aron matubag ang mga kabalaka, problema, ug pagduhaduha sa mga kanhi trabahante sa probinsya sa Maguindanao.
Matud ni Maguindanao del Sur Provincial Administrator Atty. Cyrus Torreña, 225 ka regular nga mga empleyado, kon 49.5 porsyento sa mga trabahante sa One Maguindanao, ang manarbaho na alang sa Provincial Government sa Maguindanao del Sur, samtang 230 ka regular nga empleyado, o 50.5 porsyento, ang mamahimong trabahante sa Maguindanao del Norte.
Gi-anunsyo sab nga si Atty. Mohajiroe Lauban ang mamahimong OIC Provincial Administrator sa Maguindanao del Norte.
Gibalhin na ang mga empleyado sa Maguindanao del Norte Provincial Government were ngadto sa Sangguniang Panlalawigan Building sa Datu Odin Sinsuat Maguindanao Municipal Compound, nga magsilbi sab nag ilang temporaryong buhatan.
Magmugna na ang duha ka lalawigan sa Maguindanao og ilang mga kaugalingong himno, bandera, ug selyo nga aprubahan sa ilang tagsa-tagsang sangguniang panlalawigan.
Gipagula na sa Maguindanao del Sur, pinaagi sa ilang official Facebook page, ang aprubado na nilang opisyal nga selyo kagahapon human sa labing unang sesyon sa ilang Sangguniang Panlalawigan.
Kahinumduman nga niadtong Setyembre 17, 2022, 706,558 ka mga botante sa One Maguindanao, kon 99.27 porsyento sa kinatibuk-ang ihap sa mga boto, ang miratipika sa Republic Act No. 11550, ang balaod nga nagmugna sa mga lalawigan sa Maguindanao del Norte ug Maguindanao del Sur.