By Jim Lloyd Dongiapon
Gikumpirma ni Davao City 3rd District Representative Isidro Ungab karong Martes nga na-transmit na ngadto sa Malacañang ang Metropolitan Davao Development Authority (MDDA) bill ug nagahulat na lang mapirmahan ni Presidente Rodrigo Duterte.
Mamahimo na kining usa ka balaod dul-an tulo ka bulan human aprubahan sa tanang Senador ang House Bill (HB) 8390, nga magmugna sa MDDA. Tumong sa bag-ong ahensya nga ipamental ang paspas nga paglambo sa Davao Region pinaagi sa malahutayong mga reporma padulong sa pag-uswag sa ekonomiya.
Subay sa mga probisyon niini, langkuban sa 15 ka mga lokal nga panggamhanan ang MDDA, nga mao ang: Dakbayan sa Davao; mga Dakbayan sa Panabo, Tagum, ug Samal, ug ang lungsod sa Carment sa Davao del Norte; Dakbayan sa Digos ug mga lungsod sa Santa Cruz, Hagonoy, Padada, Malalag, ug Sulop sa Davao del Sur; lungsod sa Maco sa Davao de Oro; mga lungsod sa Malita ug Santa Maria sa Davao Occidental; ug ang Dakbayan sa Mati sa Davao Oriental.
Ang nasangpit nga development authority ang magbansay sa mga musunod nga kamanduan: development planning; transport management; solid waste disposal and management; flood control and sewerage management; urban renewal, zoning, land use planning, shelter services; health and sanitation, urban protection, and pollution control; ug public safety.
Mugnaon sab ang MDDA council nga manguna ug mubuhat og mga palisiya alang sa mga lokal nga panggamhanan ilawom niini. Mulangkub sa konseho ang chairperson sa Regional Development Council, mga gobernadora sa mga probinsya sa Davao del Norte, Davao del Sur, Davao Oriental, Davao de Oro, ug Davao Occidental, ug ang 15 ka alkalde sa mga dakbayan ug lungsod nga pagadumalaan niini.
Inombrar sa Presidente ang chairperson sa development authority, nga maggikan sa mga pinili nga nominado sa konseho, ug magsilbi kini sulod sat ulo ka tuig nga termino.
Magsilbi usab nga ex-officio members ang mga alkalde sa 15 ka lokal nga panggamhanan.
Musalmot usab sa mga panagtapok sa konseho ang mga regional head sa nagkadaiyang ahensya sa gobyerno isip non-voting members, nga maggikan sa: National Economic and Development Authority (NEDA); Department of Human Settlements and Urban Development (DHSUD); Department of Public Works and Highways (DPWH); Department of the Interior and Local Government (DILG); Department of Environment and Natural Resources (DENR); Department of Health (DOH); Department of Information and Communications Technology (DICT); Department of Energy (DoE), Department of Tourism (DoT); Department of Transportation (DoTr); Land Transportation Office (LTO); ug Philippine National Police (PNP).