By Jim Lloyd Dongiapon
––
Kakurat na lamang ang nabati sa usa ka member-consumer-owner (MCO) sa Northern Davao Electric Cooperative (NORDECO) gikan sa lungsod sa Asuncion, Davao del Norte human niya madawat ang bill sa kuryenta nga mikabat sa kapin ₱1.5 milyon niadtong Martes, Setyembre 27.
Daling gi-report sa hingtungdang MCO ngadto sa NORDECO ang giingong mali nga pagbasa sa ilang metro sa kuryente, ug miingon pa kini nga anaa lamang sa kapin ₱4,000 ang ilahang binulan nga konsumo.
Karong Huwebes sa hapon, Setyembre 29, nagpagula og opisyal nga pahayag ang NORDECO pinaagi sa ilang Facebook page aron mangayo og pasaylo sa maong kasaypanan.
“Niabot sa buhatan sa NORDECO ang nikalat nga usa ka post sa social media mahitungod sa power bill nga mikabat sa 1.5 Million Pesos. Ang NORDECO nangayo ug pasensya sa maong sayop,” segun sa NORDECO.
Matud pa sa NORDECO, nakaplagan na lamang nila ang maong sayop dihang giimprenta na ang bill ug dali nila kining gitul-id.
“Sa pag-print sa bill sa Consumer Accounts Processor sa NORDECO, nakita nga mali ang reading. Dali-dali dayun kini nga gi-correct sa NORDECO ug wala na gihatag ang maong bill sa miyembro-konsumante-tag-iya ug gilabay kini sa basurahan. Dakong katingala na lamang sa buhatan nga kani anaa na sa social media,” matud sa kooperatiba.
Ang pamahayag nagpadayon, “Usa kani ka Human Error ug dili tinuyuan nga matuplok ang laing numero nga hinungdan sa taas nga reading.”
“Gisiguro sa panggamhanan sa NORDECO nga kani isolated case lamang ug walay intensyon ang atong Kooperatiba nga manikas sa atong mga minahal nga miyembro-konsumante-tag iya,” dugang niini.
Nagpahinumdum ang nasangpit nga electric cooperative ngadto sa publiko nga ug galing dunay suliran nga mahitabo, kinahanglang dali nila kining i-report ngadto sa ilang buhatan o pinaagi sa ilang mga numero sa telepono ug sa Messenger.
Sa bulan sa Setyembre 2022, anaa sa ₱17.0374 matag kilowatt hour (kWh) ang residential power rate sa NORDECO.