By:Jim Lloyd Dongiapon
Nagdeklara kagahapong adlawa ang Barangay Disaster Risk Reduction and Management Council sa Naga, Laak, Davao de Oro og state of emergency Monday gumikan sa diarrhea outbreak nga nakaplagan sa duha ka purok diin, subay sa ulahing update, dunay 150 ka panimalay ang naapektuhan, 22 ka indibidwal ang kasamtangang gi-admit sa mga ospital samtang duha ka pasyente ang nakalas tungod sa nasangpit nga kondisyon.
Hugot nga ginamonitor sa mga panggamhanan sa nahisgutang lungsod og lalawigan ang sitwasyon sa maong barangay.
Atol sa emergency meetingnga gitambungan sa mga opisyal sa Barangay Naga, Provincial Health Office, Municipal Health Office, Municipal Administrator, Municipal Engineer, Municipal DRRMO, ug sa Philippine Red Cross, gipresenta ni Sholyn Rose Asedilla, ang Disease Surveillance Officer sa Department of Health-DDO, ang pipila sa mga posibleng hinungdan sa outbreak.
Pipila niini mao ang: kontaminasyon sa tinubdan sa tubig sa maong dapit tungod sa hugaw o mha kemikal, ug ang kawad-on sa mga batakang pasilidad sa sanitasyon sama sa mga kasilyas.
Nagpahigayon na og water sampling aron masuta ang hinungdan sa diarrhea outbreak, ug mugawas na ang resulta niini sulod sa 24 oras.
Nakatakda usab magpahigayon og chemical sampling sa mga tinubdan sa tubig aron kumpirmahon kung misagol ba ang mga kemikal. Duha ka semana pa ang hulaton ayha mugawas ang resulta niini.
Magpahigayon ang Provincial Health Office ug general terminal cleaning sa mga pundohanan sa tubig aron limpyuhon ug i-decontaminate ang mga kakuhaan og tubig sa mga nanimuyo.
Misugyot ang Philippine Red Cross, pinaagi ni Corporate Social Responsibility/Disaster Management Officer Marcid Van Solinap, nga dili usa pagamiton ang mga tinubdan sa tubig sa mga apektadong barangay samtang ginahulat pa ang resulta sa chemical sampling.
Sa karon, nagmontar na ang Barangay Naga og usa ka Observatory Area alang sa mga apektadong residente nga dili pa manginahanglan nga dad-on sa ospital aron ma-monitor sila sa mga health personnel.
Migahin na ang Laak LGU og duha ka rescue vehicles ug galing dunay emerhensiya ug usa ka 2000-litros nga stainless nga tangke nga magsilbi isip tipiganan og limpyong tubig alang sa mga residente sa nasangpit nga barangay.
Nakaalerto na usab ang Davao de Oro Provincial Hospital-Laak sa mga pasyenteng manginahanglan og intensibong pag-atimang medikal.