By Jim Lloyd Dongiapon
Gisaway ni outgoing Davao City Mayor ug Vice President-Elect Sara Duterte-Carpio ang tweet sa peryodista nga Raissa Robles diin gipasumbingay niini nga ang pagpamihag sagad nang gapanghitabo sa Mindanao, ug dili luwas ang rehiyon alang sa mga turista.
Niadtong Hunyo 2, 2022, nag-tweet si Robles isip reaksyon ngadto sa pagnombrar ngadto sa tigpamaba ni Duterte-Carpio ug alkalde sa Liloan, Cebu nga si Christina Garcia-Frasco isip secretary-designate sa Department of Tourism.
Sumala niya, “Apparently, Frasco would like to open up Mindanao to tourism. I’m sure the extremist Abu Sayyaf and other bandits would be pleased by the prospects of so many potential kidnap victims. Way to go, Frasco. Prep for ransom negotiations. ASG might ask you to nego personally (Murag gusto ni Frasco ablihan ang Mindanao alang sa turismo. Sigurado ko nga ang ekstrimistang Abu Sayyaf ug uban pang mga bandido ang malipay sa mga palaaboton sa mga potensyal nga biktima sa pagpangdagit. Padayon, Frasco. Pag-andam na lang sa mga posibleng negosasyon sa lukat. Posible usab nga muhangyo ang ASG nga ikaw mismo ang personal nga makignegosasyon).”
Sa usa ka pamahayag nga gipagula niadtong Sabado (Hunyo 4) sa gabii, gipangasabaan ni Duterte-Carpio si Robles sa iyang reaksyon nga matud pa “puno sa pagkadanghag ug pagka-iresponsable isip peryodista’ ug kini ‘usa ka butang nga nanawagan sa atong hiniusang pagkondenar tungod kay kini grabe nga nagpihig batok sa tanan nga mga Mindanawon, labi na sa mga nagpuyo sa mga komunidad sa Moro.”
“What Robles did was a demonization of Mindanao and an insult to its people, who also deserve to experience the gains of the Duterte administration over the past six years (Ang gibuhat ni Robles usa ka pagpamuritsing sa Mindanao ug usa ka insulto sa katawhan niini, nga angayan ra usab nga makasinati sa mga kadaugan sa administrasyong Duterte sa miaging unom ka tuig),” ingon ni Duterte-Carpio.
“Robles clearly wanted to undervalue everything that the Duterte administration has done in keeping the peace and security in Mindanao and ensuring that concerns caused by terrorist organizations, including kidnap for ransom groups, are addressed appropriately with the help of local governments and leaders of communities (Klaro nga gusto nI Robles nga pakamenoson ang tanang gibuhat sa administrasyong Duterte aron mapatuman ang kalinaw ug seguridad sa Mindanao ug sa pagsiguro nga ang mga kabalaka nga gipahinabo sa mga teroristang organisasyon, lakip ang mga grupo sa kidnap for ransom, tukma nga matubag pinaagi sa tabang sa mga lokal nga gobyerno ug mga lider sa mga komunidad),” dugang niya.
Gitumbok usab sa Vice-president-elect nga ang nga ang mga kalihokan sa pagpangdagit sa Abu Sayyaf Group (ASG) mikunhod pag-ayo sukad milingkod ang iyang amahan nga si outgoing President Rodrigo Duterte sa katungdanan niadtong 2016.
“In Basilan, as confirmed by [Basilan] Rep. Mujiv Hataman himself, there had been zero kidnapping incidents since President Duterte came into office. All other incidents concerning ASG had been about the arrests and surrenders of their members and leaders (Sa Basilan, sumala sa gipamatud-an mismo ni [Basilan] Rep. Mujiv Hataman, wala nay mga insidente sa pagdagit sukad sa paglingkod ni Presidente Duterte. Ang tanan nga uban pang mga insidente bahin sa ASG may kalabutan sa pag-aresto ug pagtahan sa ilang mga miyembro ug mga lider),” hisgot sa gumagawas nang alkalde sa Davao City isip pagbulig sa iyang pamahayag.
Gitapos ni Duterte-Carpio ang iyang opisyal nga pahayag pinaagi sa pag-ingon nga, “as a Filipino, Robles should be ashamed of herself for dangerously trying to stoke and encourage terrorist groups to target tourists in Mindanao (isip usa ka Pilipino, kinahanglan nga maulaw si Robles sa iyang kaugalingon tungod sa peligrosong pagsulay niini nga pukawon ug dasigon ang mga grupo sa terorista nga puntaryahon ang mga turista sa Mindanao).”